नेपाल र भारतका परराष्ट्र मन्त्रीबीच फोन : खोप आपूर्तिका लागि सहजीकरण गर्न भारतलाई आग्रह

ByLumbini Darpan Online

२८ चैत्र २०७७, शनिबार ०१:४० २८ चैत्र २०७७, शनिबार ०१:४० २८ चैत्र २०७७, शनिबार ०१:४०

लुदअ चैत २७, काठमाण्डौ
नेपाल र भारतका परराष्ट्रमन्त्री बीच शुक्रवार टेलिफोन वार्ता भएको छ । परराष्ट्रमन्त्री प्रदीपकुमार ज्ञवाली र भारतका बाह्य मामिला मन्त्री एस। जयशङ्करबीच भएको वार्तामा कोभिड–१९ को महामारीविरुद्ध लड्ने तथा त्यसलाई परास्त गर्ने कार्यमा निरन्तर सहयोग आदानप्रदान गर्न सहमति भएको छ ।

दुवै देशका परराष्ट्र मन्त्रीले कोभिड–१९ महामारीविरुद्धको लडाइँमा थप सहयोगको अभिवृद्धि गर्नेसहित खोपको आपूर्तिबारे विचार–विमर्श गर्नुभएको परराष्ट्र मन्त्रालयले जनाएको छ ।

परराष्ट्र मन्त्री ज्ञवालीले कोभिड महामारीविरुद्धको नेपालको लडाइँमा १० लाख मात्रा कोभिशिल्ड खोप उपलब्ध गराएकामा भारत सरकारप्रति हार्दिक आभार व्यक्त गर्नुभयो । साथै उहाँले कोभिडको उच्च जोखिममा परेका नेपालीलाई दोस्रो मात्रा खोप लगाउन आवश्यक पर्ने थप खोपको आपूर्तिका लागि सहजीकरण गर्न भारतका बाह्य मामिला मन्त्रीसँग अनुरोध गर्नुभएको मन्त्रालयद्वारा जारी विज्ञप्तिमा जनाइएको छ ।

प्रत्युत्तरमा बाह्य मामिला मन्त्रीले खोप आपूर्तिसहित महामारीबाट पार पाउन नेपालको प्रयासमा भारतको निरन्तर साथ र सहयोग रहने आश्वासन दिनुभयो ।

Facebook Comments Box

Leave a Reply

Your email address will not be published. Required fields are marked *