बुटवल, १३ बैशाख
लुम्बिनी प्रदेश सरकारले बुटवल, नेपालगञ्ज, दाङ र भैरहवामा अक्सिजन बेड बनाउन त्यहाँ रहेका कोभिड अस्पतालहरूलाई बजेट उपलब्ध गराउने निर्णय गरेको छ । सोमबार कोरोना भाइरस उपचार तथा उपचार रोकथाम कोषको निर्देशक समितिको बैठकले बजेट उपलब्ध गराउने निर्णय गरेको गरेको मुख्यमन्त्रीको कार्यालयले जनाएको छ ।
कोभिड–१९ का बिरामीको संख्या बढ्दा अस्पतालमा बेड अभाव भएपछि प्रदेश सरकारले अक्सिजनसहितको बेड बनाउन पहल गरेको हो । प्रदेश सरकारले कोरोनाको उपचारलाई थप प्रभावकारी बनाउन बुटवल, दाङ र बाँकेस्थित कोरोना विशेष अस्पताललाई गरी १ करोड ७५ लाख रुपैयाँ रकमान्तर गरी तत्काल उपलब्ध गराउने निर्णय गरेको मुख्यमन्त्रीका प्रेस सल्लाहकार शेरबहादुर केसीले जानकारी दिनुभयो ।
केसीका अनुसार प्रदेश सरकारले बुटवल, दाङ र नेपालगञ्जले ५० लाख रुपैंयाँका दरले र भैरहवास्थित भीम अस्पताललाई २५ लाख रुपैयाँ उपलब्ध गराउने छ । उक्त रकम उपलब्ध गराउने काम सोमबारदेखि नै सम्बन्धित मन्त्रालयले गर्ने उहाँले बताउनुभयो । त्यसैगरी कोरोना रोकथाम तथा उपचार कोषमा लुम्बिनी प्रदेश सरकारले १० करोड रुपैयाँ थप गर्ने निर्णय गरेको छ ।
