तिलोत्तमा नगरपालिका, वास सहकारी र युएनडीपिको समन्वयमा तिलोत्तमामा रहेका सरसफाई कर्मीहरुका लागि सरसफाई तथा पेशागत सुरक्षा समाग्री हस्तारन्तरण गरिएको छ । तिलोत्तमा ७ दुर्गामन्दिरमा आज एक कार्यक्रमको आयोजना गरी नगरपालिकामा सरसफाईमा काम गर्ने ४० जना सरसफाई कर्मीहरुलाई हेलमेट, गमबुट, पन्जा, मास्क, ज्याकेट, आइडी कार्ड वितरण गरिएको हो । आजै १७ वटै वडाका टोल विकास संस्थालाई झाडु, २ वटा बेल्चा, २ वटा कोदालो, आसी र तरवार समेत हस्तान्तरण गरिएको छ । कार्यक्रममा बोल्दै तिलोत्तमाका नगर प्रमुख बासुदेव घिमिरेले सरसफाईमा नगरबासी संवेदनशील हुनुपर्नेमा जोड दिनुभयो । उहाँले सरसफाई कर्मीले सरसफाई गरिरहने तर नगरवासीले फोहोर गर्न नछाड्ने अवस्था आउन नहुने बताउनुभयो । कार्यक्रममा युएनडीपिका लुम्बिनी तथा गण्डकी प्रदेश प्रमुख सुदीप अर्यालले काम गर्दा सुरक्षिलाई प्राथमिकतामा राख्नु पर्ने बताउनुभयो । सुरक्षाका साथ काम गर्दा परिणाम समेत सकारात्मक आउने उहाँको बुझाई छ । जनसहभागिता वास सहकारी संस्थाका अध्यक्ष खेम प्रसाद गौतमको अध्यक्षता, सचिव यानुमाया पुनको संचालन, उपाध्यक्ष ठानेश्वर चापागाईको स्वागतमा कार्यक्रम सम्पन्न भएको थियो ।