लुदअ, कपिलवस्तु
अमेरिकी सहायता परियोजना (एमसीसी) प्रतिनिधि सभाबाट अनुमोदन भएको छ । आइतवार बसेको प्रतिनिधि सभाको दोस्रो बैठकले एमसीसी सम्झौता संसदबाट अनुमोदन गरेको हो । एमसीसी बिषयलाई लिएर प्रतिपक्ष मात्र हैन सत्तापक्षका नेता कार्यकर्ताहरुले विरोध गरिरहेका छन् ।
विभिन्न पार्टी तथा जनवर्गीय संगठनहरुले पनि देशैभर विरोध प्रदर्शन गरिरहेका छन् ।
यसै बिचमा एमसीसीको पक्षमा उभिएका कांग्रेसका नेता गगन थापाको अभिव्यक्ति प्रति एक युवाले प्रश्न उठाएका छन् । नेकपा एमाले बाणगंगा नगरपालिका वडा नं. ४ वडा कमिटि सचिव निर्मल शमाले थापाको अभिव्यक्तिले सबै युवाहरु मथि प्रश्न उठेको बताउँछन् । कांग्रेस नेता थापाले अन्य देशसंग मागेर देशको विकास गर्नुपर्छ भन्ने अभिव्यक्ति माथि गम्भिर प्रश्न उठाएका हुन् ।
उनले सामाजिक संजालमा लेखेका छन्, गगन थापा ज्यु !! क्या रहेछ तिम्रो बिचार वा !! म गगन थापा, बिश्व प्रकाश शर्मा जस्ता व्यक्तिलाइ आइडल मान्ने व्यक्ती हुं परन्तु आज गगन थापाको त्यो अभिव्यक्तिले आज फेरि यो सावित गर्दियो कि युवा आएर मात्र देश विकास हुदो रहेनछ !! जापान पनि विश्व युद्धमा धरासइ भएको देश हो तर आज जापान विश्वको सबै भन्दा विकसित देश हो ।
आज जापान यो स्थानमा आइपुग्नुमा स्वमं कै संघर्ष ले हो । आज यस्ता देशहरुबाट केही सिक्न पर्ने ठाउँमा भिख माग्ने जस्तो अभिव्यक्ति आउनु त्यो पनि एक युवा नेता गगन थापाबाट यो अत्यन्तै दुःखद कुरा हो । गगन थापाबाट यस्तो अभिव्यक्ति आउनुले आज युवा पुस्ता माथी प्रश्न चिन्ह खडा भएको छ । आज युवाहरुलाइ राजनीतिमा ल्याउनु पर्छ भन्ने माग उठेको बेलामा एक युवा नेता युवाहरुको प्रेरणा मानिने नेताबाट नै एस्तो अभिव्यक्ती आउनाले स्पष्ट पारेको छ कि युवा आएर मात्र देश विकास हुँदैन । के हामिलाई आफ्नो देश विकास गर्न विदेशीको भिख चाहिने हो ? अध्ययन गरौं हामी सङ्ग कति छन् स्रोत साधन । हामिले आफैं संघर्ष गर्ने हो भने आफ्नो देश आफै बिकास गर्न सक्छौं ।
