फागुन २६ ।

देवदहमा नदिजन्य  पदार्थको अबैध उत्खनन र तस्करी हुने गरेको पाईएको छ । नगरको वडा नम्बर ११ स्थित रोहिणी नदि किनारबाट दिनहुँ नदिजन्य पदार्थको उत्खनन र तस्करी हुँदै आएको स्थानीय बताउँछन् । मंगलबार अबैध उत्खनन हुने स्थानमै वडाध्यक्ष र पत्रकारको उपस्थितिमा स्थानीय रुवास गुप्ता लगायतले नदिबाट दिनहुुँ चोरी निकासी हुँदा समेत सरोकारवाला निकाय मौन बसेको आरोप लगाए । आफ्नो गुनासो पत्रकारमाझ राख्न जम्मा भएको स्थानीयको ठूलो समुहले निर्वाचन आएको र भोटको कारण स्थानीय राजनीतिक नेतृत्व समेत उक्त कार्यमा मौन बसेको भन्दै वडाध्यक्षकै अगाडि आपत्ति जनाए । सोही स्थानमा उपस्थित केही ट्र्याक्टर संचालकहरूले समेत अबैध उत्खनन हुने गरेको स्विकार्दै उक्त कार्य सबैको मिलेमतोमा हुने बताए । स्थानीय तह र धकधई इलाका प्रहरी कार्यालय तर्फ इंकित गर्दै स्थानीयले प्रहरीले चाहे अबैध निकासी रोकिन सक्ने भन्दै सबैको मिलेमतोमा उक्त कार्य हुँदै आएको आरोप लगाएका छन । नदि किनारमै उपस्थित भएका वडा नं. ११ का वडाध्यक्ष अमरबहादुर चौधरीले समेत चोरी निकासी हुने गरेको स्विकार गर्दै रातको समयमा चोरी हुने भएकोले रोक्न गाह्रो हुने गरेको बताए । यसबारे आफुले कार्यपालिकामा समेत कुरा उठाएको उल्लेख गर्दै चौधरीले यसप्रकारको अबैध उत्खनन रोकिनुपर्नेमा आफुले पनि जोड दिंदै आएको बताए । यसबारे धकधई इलाका प्रहरी कार्यालयका प्रमुख कृष्ण प्रसाद बेल्वासेसङ्ग कुरा गर्दा नदिजन्य पदार्थको चोरी निकासी जस्तो अपराधीक कार्यमा प्रहरीको मिलेमतो हुनै नसक्ने बताए । आफू कार्यालय प्रमुखको रुपमा धकधइ इलाका प्रहरी कार्यालयमा आएको १५ दिन मात्रै भएको उल्लेख गर्दै बेल्वासेले १ हप्ताको विचमा ४ ट्र्याक्टर र २ टिप्पर पक्राउ गरि रु. ३०९३० जरिवाना गराएको बताए । आँफू कार्यालय प्रमुख भएर आएपछि यसप्रकारको चोरी निकासीबारे अध्ययन गरेको र अध्ययनका क्रममा धेरै जसो स्थानीयको घरमा नदिजन्य पदार्थ थुपारिएको पाईएकोले त्यसबारे देवदह नगरपालिकालाई जानकारी गराईसकेको उनको भनाइ छ । यसप्रकारको चोरी निकासीबारे जनप्रतिनिधिहरूले पनि अनुगमन गरि स्थानीयलाई बुझाउन सकेको खण्डमा अबैध निकासी रोक्न सहज हुने बेल्बासेको बताउँछन् ।