भैरहवा, १ असार ।भैरहवामा लक्षित वर्गका लागि सुनचाँदीका गहना बनाउने सीपमूलक तालिम सुरु भएको छ । सिद्धार्थनगर सुनचाँदी व्यवसायी संघ सिद्धार्थनगर–१३, रुपन्देहीको आयोजना तथा सिद्धार्थनगर नगरपालिकाको कार्यालयको सहयोगमा कार्यक्रम सुरु गरिएको हो । तालिम असार १५ गतेसम्म सञ्चालन हुने संघका सदस्य तथा कार्यक्रम संयोजक किरण लामगादेले बताए ।
कार्यक्रममा प्रमुख अतिथि नेपाल सुनचाँदी व्यवसायी महासंघका विज्ञ परामर्श समिति संयोजक प्रेम कुमार सेञ्चुरीले बोल्दै दक्ष कालिगढ बन्ने सके राम्रो आर्यआर्जन गर्न सकिने बताए । उनले राम्रो कालीगढ बन्छु भन्ने अठोट लिएर अघि बढ्न तालिमका सहभागिहरुलाई आग्रह गरे । उनले भने, ‘लक्षित वर्गका लागि प्रत्येक वर्ष स्थानीय तहले बजेट विनियोजन गर्दै आएका छन् । ’
विशिष्ट अतिथि नेपाल सुनचाँदी व्यवसायी महासंघ लुम्बिनी प्रदेशका उपाध्यक्ष विक्रम बहादुर सुनारले उत्कृष्ट कालिगढ बन्न तालिम सहयोगी हुने बताए । उनले तालिमलाई तालिमको रुपमा मात्र नलिइ ध्यान दिएर सिक्न सहभागिहरुलाई आग्रह गरे । उनले श्रम, सीप, अनुशासन र विकास आवश्यक रहेकोमा जोड दिए ।
अन्य अथिति लगाएत २५ जना प्रशिक्षार्थीको सहभागिता रहेको प्रमुख प्रशिक्षक तथा सिद्धार्थनगर सुनचाँदी व्यवसायी संघका कार्यसमिति सदस्य ध्रुव लामगादेले बताए ।
