हरि आचार्य, कपिलवस्तु
लगातार ५ बर्ष विकास निर्माणको काममा नगरमै उत्कृष्ट हुन सफल कपिलवस्तुको बाणगंगा नगरपालिका वडा नं. ७ ले शिक्षा क्षेत्रमा फेरी अर्को उदाहरणीय कार्य गरेको छ । वडाको चालु आर्थिक बर्ष २०७८/७९ अन्तर्गत लक्षित वर्गको कार्यक्रम अनुसार विद्यार्थी प्रोत्साहन पुरस्कार तथा शिक्षक सम्मान कार्यक्रमको आयोजना गरि नगरमै नयाँ र प्रभावकारी कार्य गर्न सफल भएको छ । वडाका ३ वटै सामुदायिक विद्यालयका उत्कृष्ट विद्यार्थीलाई शैक्षिक सामग्री प्रदान गरिएको र शिक्षकलाई सम्मान गरिएको वडाध्यक्ष बिष्णु गिरीले जानकारी दिनुभएको छ ।
एक कार्यक्रमको आयोजना गरि वडाका जनज्योती मावि, नवदुर्गा आधारभुत विद्यालय र जनचेतना आधारभुत विद्यालयको आधारभुत तह (कक्षा १ देखि ८ सम्म) का विद्यार्थीहरु मध्ये प्रत्येक कक्षाका २४ जना प्रथम विद्यार्थीहरुलाई प्रोत्साहन स्वरुप १/१ वटा झोला, ३/३ वटा कापि र कलम प्रदान गरिएको हो । शैक्षिक सामग्री प्राप्त गरेसंगै वालवालिका खुसी भएका छन् । त्यस्तै ती सामुदायिक विद्यालयमा मुख्य ५ विषय अध्यापन गराउने उत्कृष्ट सिकाई उपलब्धि हासिल गर्ने शिक्षकलाई १/१ वटा डायरी, कलम तथा दोसल्ला ओढाएर सम्मान गरिएको वडा कार्यालयले जनाएको छ ।
उत्कृष्ट विद्यार्थीहरुलाई हौसला स्वरुप शैक्षिक सामग्री वितरण गरिएको बताउदै वडाध्यक्ष गिरीले वडाको वडाको शैक्षिक अवस्था क्रमशः सुधार हुंदै गएको बताउनुभयो । वडाध्यक्ष गिरीले भौतिक विकास निर्माणले मात्र समृद्ध नहुने भन्दै शिक्षा क्षेत्रमा लगाएको लगानी खेर नजाने बताउनुभयो ।
कार्यक्रमका अध्यक्ष समेत रहनुभएका गिरीले वडाका सम्पुर्ण विद्यालयका भवन, शौचालय लगायत भौतिक काम करिव सकिएको र अब शिक्षाको गुणस्तर राम्रो बनाउने तर्फ वडा लागिपरेको बताउनुभयो ।
वडा सदस्यहरु हरि शंकर पौडेल, मुम बहादुर पाण्डे, साबित्रा थारु, पार्वती सुनार, जनज्योती मावि मोतिपुरका प्राचार्य विष्णु प्रसाद भण्डारी, नवदुर्गा आधारभुत विद्यालय मोतिपुरडाँडाका प्राचार्य बलराम पाण्डे, टोल विकास संस्थाका अध्यक्षहरु मान बहादुर कार्की, राम बहादुर बस्नेत, प्रदिप क्षेत्री, कृष्ण गैरे, शिक्षक, विद्यार्थी उपस्थिती रहेको कार्यक्रम वडा सचिव कृष्ण प्रसाद खनालको सञ्चालनमा सम्पन्न भएको हो ।
तस्बिरहरु
