चन्द्रौटा । कपिलवस्तुको विजयनगर गाउँपालिका–२, मगरघट्टास्थित नेपाल तारा माध्यमिक विद्यालयमा करिब १ करोड रुपैयाँ लागतको चारकोठे नयाँ शैक्षिक भवन निर्माणको शिलान्यास गरिएको छ।
गाउँपालिका अध्यक्ष गोपालबहादुर थापा मगर, उपाध्यक्ष लक्ष्मी कुमारी चौधरी तथा पूर्व वन तथा वातावरण राज्यमन्त्री रुपा विकका प्रतिनिधि सुरज विकले संयुक्त रूपमा भवनको शिलान्यास गरेका हुन् । पूर्वराज्यमन्त्री रुपा विकको विशेष पहलमा प्राप्त बजेटबाट भवन निर्माण कार्य सुरु गरिएको जनाइएको छ।
शिलान्यास कार्यक्रममा गाउँपालिका अध्यक्ष थापा मगरले गुणस्तरीय शिक्षाका लागि विद्यालयको भौतिक पूर्वाधार सुदृढ हुनुपर्ने आवश्यकता औँल्याउँदै नयाँ भवनले शैक्षिक वातावरण थप सुधार हुने विश्वास व्यक्त गरे ।
उपाध्यक्ष चौधरीले विद्यार्थीलाई सुरक्षित, व्यवस्थित र गुणस्तरीय सिकाइ वातावरण उपलब्ध गराउन गाउँपालिकाले शिक्षा क्षेत्रलाई उच्च प्राथमिकतामा राख्दै आएको बताईन।
फोनमार्फत आफ्नो धारणा राख्दै पूर्वराज्यमन्त्री रुपा विकले नयाँ भवन निर्माणले विद्यालयको शैक्षिक विकासमा महत्वपूर्ण टेवा पुग्ने विश्वास व्यक्त गरिन।
विद्यालय व्यवस्थापन समितिका अध्यक्ष रघुनाथ प्रसाद चाईले भवन निर्माणका लागि बजेट व्यवस्थापन गरी सहयोग गरेकोमा पूर्वराज्यमन्त्री रुपा विक तथा गाउँपालिकाका जनप्रतिनिधिप्रति आभार व्यक्त गरिन।
प्रधानाध्यापक देवेश कुमार मौर्यले नयाँ भवन निर्माणपछि विद्यार्थीले टिनको छानामुनि अध्ययन गर्नुपर्ने बाध्यताको अन्त्य हुने र पठनपाठन थप सहज तथा प्रभावकारी बन्ने बताए।
भवन निर्माणको ठेक्का रेसुङ्गा बी.एल. जेभी कम्पनीले प्राप्त गरेको छ। करिब १ करोड रुपैयाँ लागतमा निर्माण हुने उक्त भवनले विद्यालयको भौतिक पूर्वाधारलाई थप मजबुत बनाउने अपेक्षा गरिएको छ।
शिलान्यास कार्यक्रममा जनप्रतिनिधि, विद्यालय व्यवस्थापन समिति, शिक्षक, अभिभावक तथा स्थानीयवासीको उल्लेखनीय सहभागिता रहेको थियो।