लुदअ जेठ २, काठमाण्डौ
प्रतिनिधि सभा गठन भएको झण्डै ६ महिनापछि संसदीय समिति क्रियाशील भएका छन् ।

सभामुख देवराज घिमिरेले १० वटै समितिको बैठक राख्न दिएको सुझाव अनुसार आज प्रतिनिधि सभा मातहतका सबै विषयगत समितिको बैठक एकैसाथ बस्ने तयारी रहेको सङ्घीय संसद् सचिवालयका सहप्रवक्ता दशरथ धमलाले जानकारी दिनुभयो । बैठक ९ बजे बस्नेगरी बोलाइएको छ ।

समितिका सभापति चयन नभएसम्मका लागि ती समितिको बैठकको अध्यक्षता ज्येष्ठ सदस्यले गर्नुहुनेछ । प्रतिनिधि सभा अन्तर्गत अर्थ, अन्तर्राष्ट्रिय सम्बन्ध र पर्यटन, उद्योग तथा वाणिज्य र श्रम तथा उपभोक्ता हित, कानुन, न्याय तथा मानवअधिकार, कृषि सहकारी तथा प्राकृतिक स्रोत, महिला तथा सामाजिक मामिला, राज्यव्यवस्था तथा सुशासन, पूर्वाधार विकास, शिक्षा, स्वास्थ्य तथा सूचना प्रविधि तथा सार्वजनिक लेखा समिति छन् ।

पुस ७ गते प्रतिनिधि सभाका सदस्यहरूले पद तथा गोपनीयताको शपथ लिएसँगै कार्यकाल सुरु भएको थियो । तर विषयगत समिति गठनमा ढिलाइ हुँदा मिनी संसद् मानिने समिति क्रियाशील हुन सकेका थिएनन् ।

गएको वैशाख १५ गते १० वटा समिति गठनको घोषणा गरिएको थियो । समितिको प्रमुख कार्यजिम्मेवारी सचिवालयमा दर्ता भइ सभाले सैद्धान्तिक, दफावार छलफलका लागि पठाएका विधेयकलाई निष्कर्षमा पुर्याउनु रहेको छ । सभामा ठूलो सङ्ख्या हुने भएकाले र सबै काम गहिरोसँग अध्ययन तथा अनुसन्धान गरी निष्कर्षमा पुर्याउन समस्या हुने भएकाले प्रभावकारी कार्यसम्पादन गर्न संसदीय समिति प्रणाली अभ्यासमा छ । ती समिति धेरैजसो २५ सदस्यीय छन् ।