लुदस, कपिलवस्तु
कपिलवस्तुको बाणगंगा नगरपालिकामा पाँचौ मेयर कप फुटवल प्रतियोगिता सुरु भएको छ । बुद्धरंगशालामा एक भव्य कार्यक्रमका बीच पाँचौ मेयर कप सुरु भएको हो ।
कार्यक्रमका प्रमुख अतिथि लुम्बिनी प्रदेश सभा सांसद विष्णु पन्थीले बाणगंगा नगरपालिकाले विकास समृद्धिसंगै खेल क्षेत्रमा समेत उत्कृष्टता हासिल गरेको बताउनुभयो । उहाँले बाणगंगाबाट भविष्यका उर्जावानसंगै क्षमतावान खेलाडीहरु तयार हुदैं गरेको भन्दै खुशी व्यक्त गर्नुभयो । खेलले खेलाडीहरुको शारीरिक, मानसिक तथा सामाजिक विकाससंगै लागुपदार्थ दुव्र्यशनी जस्ता नकारात्मक पक्षबाट टाढा राख्न समेत महत्वपूर्ण भूमिका खेलेको बताउनुभयो । युवाका लागी खेल अपरिहार्य रहेको भन्दै उहाँले वडादेखि नगरपालिकाले नै खेल क्षेत्रलाई उच्च प्राथमिकता दिएकोमा उनले धन्यवाद समेत दिनुभयो ।
प्रमुख प्रशासकिय अधिकृत भक्तिराम मरासिनीले मेयर कपले खेलाडीहरुलाई खेलप्रतिको लगावलाई थप वृद्धि गर्न मद्दत पुग्ने बताउनुभयो । उहाँले खेल सिपलाई सुधार गर्दै आफ्नो प्रतिभा प्रष्फुटन गर्न खेलाडीलाई आग्रह गर्नुभयो । उहाँले खेललाई अनुशासित र मर्यादित बनाउन अपिल समेत गर्नुभयो ।
नगरप्रमुख चक्रपाणी अर्यालको अध्यक्षता रहेको उक्त कार्यक्रममा उपप्रमुख रिताकुमारी चौधरी, ११ वटै वडाका वडाध्यक्षहरुको उपस्थिती रहेको थियो ।
कार्यक्रमको संचालन शिक्षा, युवा तथा खेलकुद शाखा प्रमुख खिमबहादुर जिसीले गर्नुभएको थियो ।
यसैबीच उद्घाटन खेलमा वडा नम्बर १ ले विजयी सुरुवात गरेको छ । वडा नम्बर १ ले वडा नम्बर ६ लाई १–० गोल अन्तरले पराजित गरेको हो । पहिलो हाफको अन्त्यतर्फ वडा नम्बर १ ले पेनाल्टीको अवसर पाएको थियो । उक्त अवसरलाई शेखर पल्ली मगरले गोलमा परिणत गरेका हुन् । पल्लीको उक्त गोल नै खेलको निर्णायक गोल बन्न पुग्यो । उनी म्यान अफ दि म्याच समेत घोषणा भए ।
भोलि विहिबार २ खेल हुनेछन् । पहिलो खेल वडा नम्बर ७ र ११ बीच हुनेछ भने दोस्रो खेल वडा नम्बर ४ र ८ बीच हुने छ ।
तस्बिहरु
