लुदस, कपिलवस्तु
प्रथम कपिलवस्तु तिलौराकोट गोल्डकप–२०८० चैत्र १७ गतेदेखि शुरू हुने भएको छ । बुद्ध रंगशालामा बुधबार पत्रकार सम्मेलन गर्दै ‘स्वास्थ्यका लागि खेलकुद राष्ट्रको लागि खेलकुद’ भन्ने मुल नारासहित प्रथम कपिलवस्तु तिलौराकोट गोल्डकप फुटबल प्रतियोगिता चैत्र १७ देखि २४ सम्म सञ्चालन हुने जिल्ला फुटबल संघका अध्यक्ष तिलक थापाले जानकारी दिए । उहाँले फिल्ड मिलाउने तथा दर्शकहरुका प्याराफिटको काम भईरहेको बताउनुभयो । अध्यक्ष थापाले खेल तालिका पनि छिट्टै सार्वजनिक गर्ने तयारी भईरहेको छ ।
अध्यक्ष थापाका अनुसार प्रतियोगितामा ‘ए’ डिभिजनका क्लबसहित ८ टोलीको सहभागिता रहने छ। जसमा थ्री स्टार क्लब, त्रिभुवन आर्मी क्लब, मछिन्द्र क्लब, नेपाल पुलिस क्लब, हनामी बीएफसी, सुदूरपश्चिम–११, सहारा क्लब र आयोजक टिमबाट कपिलवस्तु –११ रहनेछन् ।
प्रतियोगितामा प्रथम हुनेलाई ११ लाख ११ हजार १११ र दोस्रो हुनेलाई ५ लाख ५५ हजार ५५५ रुपैयाँ र शिल्ड, मेडल र प्रमाणपत्र दिइने अध्यक्ष थापाले जानकारी दिए ।
प्रथम कपिलवस्तु तिलौराकोट गोल्डकप व्यवस्थापन गर्नका लागि करिब १ करोड १८ लाख खर्च हुने अनुमान गरिएको छ ।
कार्यक्रममा जिल्ला फुटबल संघ लुम्बिनी प्रदेशका उपाध्यक्ष शक्ति सिंह ठकुरी, नेपाल पत्रकार महासंघ कपिलवस्तुका अध्यक्ष किरणमान बज्राचार्य, कपिलवस्तु उद्योग वाणिज्य संघका निवर्तमान अध्यक्ष डोलक राम घिमिरे लगायतले मन्तब्य राख्दै यो प्रतियोगिताले कपिलवस्तुमा राष्ट्रिय खेलाडीहरुको प्रतिभा प्रस्तुत हुने भएकाले सबैले अपनत्व लिई सफल बनाउनुपर्नेमा जोड दिनुभयो । पत्रकार सम्मेलन पत्रकार सागर विकको सञ्चालनमा सम्पन्न भएको थियो ।
