हरि आचार्य, कपिलवस्तु
नयाँ /नयाँ रचनात्मक र सिर्जनात्मक काम गर्दै विकासका योजनाहरु अरु वडा भन्दा छिटो छरितो सम्पन्न गर्दै आएको कपिलवस्तु जिल्लाको बाणगंगा नगरपालिका ७ नं. वडाले यस बर्ष पनि आफ्नो पहिचान अग्रस्थानमा कायम गर्न सफल भएको छ । चालु आर्थिक बर्ष २०८०/०८१ मा पनि अन्य वडाहरु भन्दा बढी योजनाहरु छनौट गरेको ७ नं. वडाले नै छिटो छरितो योजनाहरु सञ्चालन, अनुगमन र फर्स्यौट (निकासा) गर्न नगरपालिकामै रेकर्ड कायम गरेको छ ।

थोरै योजना छनौट गरेका वडाले छिटो छरितो योजना सक्नुपर्नेमा धेरै योजना छनौट गरेको वडाले छिटो योजना सम्पन्न गरि जनतालाई विकासको अनुभुति दिलाएको छ । योजना सम्पन्न गर्नमा सानो वडा र ठुलो वडा भन्ने हुंदैन । किनकी योजनाहरु सञ्चालन र फरफारक गर्ने विधि र प्रक्रिया सबैको एउटै हुन्छ । तसर्थ ७ नं. वडा विकासमा अब्बल सावित भएको नगरपालिकाको तथ्यांकले देखाएको छ ।
बाणगंगा नगरपालिकाबाट प्राप्त तथ्यांक अनुसार २०८० श्रावण १ देखि बैशाख २५ गते सम्मको वडागत योजना फर्स्यौट (निकासा) को प्रगति ८१.४२ प्रतिशत रहेको छ ।

तथ्यांकलाई विश्लेषण गर्दा अब आगामी आर्थिक बर्ष २०८१/०८२ का लागि योजना बनाउने बेला भईसकेको छ । तसर्थ चालु आर्थिक बर्षको योजना सम्पन्न गर्न पछाडि परेका वडाहरुले कसरी शत प्रतिशत योजना सम्पन्न गर्लान् ? चासोको बिषय बनेको छ । बाणगंगा नगरपालिकाको २०८१ बैशाख २५ सम्मको वडागत प्रगति हेर्दा ७ नम्बर वडाको ८१.४२ प्रतिशत रहेको छ । वडा नं. ९ भने प्रगति ६६ प्रतिशत पु–याई दोस्रो हुन सफल भएको छ भने अन्य वडाको प्रगति २६ देखि ४९ प्रतिशत रहेको छ ।

हरेक बर्षको योजनाहरु संचालनको ट्रेनलाई हेर्दा र विकासको अनुभुति जनता समक्ष छिटो लैजाने गतिलाई नियाल्दा वडा नं. ७ का वडाध्यक्ष बिष्णु गिरीले बार्षिक योजनाका कार्यहरु सञ्चालनका लागि समयमै भेलाहरु गरि निर्माण उपभोक्ता समिति गठन गर्ने, प्राविधिक स्टिमेट गर्न लगाउने, नगरपालिकामा गई योजना सम्झौता गर्ने, योजनाका कामहरु अगाडि बढाउने, काम सम्पन्न हुना साथ प्राविधिक मुल्यांकन गराउने, अनुगमन गराईहाल्ने र फाईल तुरुन्त नगरपालिका पेश गराई निकाशा लिई फर्स्यौट गर्ने गराउने गरेको देखिन्छ । अघिल्लो २०७४ को स्थानीय तहको निर्वाचनमा पनि वडा नं. ७ को वडाध्यक्षमा बिष्णु गिरी निर्वाचित भई आफ्नो ५ बर्षे कार्यकालमा पनि योजना संचालन लगायत अन्य हरेक पक्षमा बाणगंगा नगरपालिकामै चुस्त दु्रस्त रहनुभएको थियो ।

उहाँले अघिल्लो कार्यकालमा पनि वडामा निकै रचनात्मक, सिर्जनात्मक र जनमुखी एवम् प्रभावकारी काम गरि जनताका सामु आफ्नो प्रभाव छाड्नुभएको थियो । वडाका सुत्केरी महिलाहरुलाई पौष्टिक आहार अन्तर्गत कुखुराको भनले, घिउ, मह, अण्डा वितरण, १ घर १ कागती, १ घर १ हजारी, फुसको छानो हटाऔं, कर्कटपाता लगाऔं अभियान, गरिब दलित परियार सेवा समाजलाई पञ्चेबाजा वितरण, घर आंगन सरसफाई फुल लगाई सिंगार्ने महिलाहरुलाई गमला फुल पुरस्कार र सम्मानन, वडा भित्रका ३ महिने सिलाईकटाई तालिम गरेका सबै महिलाहरुलाई आत्मनिर्भर बनाउन सिलाई मेसिन प्रदान जस्ता जनमुखी कार्यहरु गर्नुभएको थियो । त्यस्तै अपांगता भएका व्यक्ति तथा एकल महिलाहरुलाई ब्याउने बाख्रा वितरण, सामुदायिक विद्यालका सबै बालबालिकाहरुलाई जाडोमा न्यानो स्विटर, शैक्षिक सामागी्र वितरण गरि चर्चामा आउनुभएको थियो ।

यो बर्षका योजना अबको केहि दिनमा सकाउने र एकोहोरो भई आगामी आर्थिक बर्षका लागि योजना निर्माण तर्फ केन्द्रित हुने वडाध्यक्ष बिष्णु गिरी बताउनुहुन्छ । अघिल्लो कार्यकालमा पनि ७ नम्बर वडा योजना छिटो छरितो संचालन गर्न अगाडि रहेको वडा ७ बर्ष नै बाणगंगा नगरपालिकामा अगाडि रहेको छ भने दोस्रो कार्यकालको दोस्रो बर्ष पनि सोहि वडा नै पहिलो भएको छ ।

हरेक बर्ष बाणगंगा नगरपालिकामै विकासमा अगाडि आउनुमा के राज छ ? भनी वडाध्यक्ष गिरीलाई प्रश्न गर्दा वडाका जनप्रतिनिधि, टोल विकास संस्था र कर्मचारीहरुको सक्रियता र जनताको साथ छ । जिम्मेवारी लिईसके पछि पुरा गर्नपर्छ, जनताको अमुल्य मतलाई खेर फाल्नु हुंदैन भन्ने सोंचेर सोहि अनुसार आफु अहोरात्र खटेर काम गरेकाले यो नतिजा आउन सफल भएको लुम्बिनी दर्पणलाई बताउनुहुन्छ ।

अघिल्लो ५ बर्षे कार्यकाल र पछिल्लो निर्वाचनको दोस्रो बर्ष पनि यी सबै कामले वडाध्यक्ष बिष्णु गिरी एक कुशल जनप्रतिनिधिको रुपमा स्थापित भई जनतालाई स्थानीय सरकारको अनुभुति दिलाउन सफल हुनुभएको वडावासीले बताएका छन् । वडाध्यक्ष गिरीले चालु आर्थिक बर्षको बांकी २ महिनाको अवधिमा बैशाख सम्ममा १०० प्रतिशत योजना सम्पन्न गरि जेठ र असारमा आगामि आर्थिक बर्ष २०८१/०८२ का लागि नयाँ योजनाहरु संकलन, छनोट र बजेट विनियोजन गर्ने लुम्बिनी दर्पणलाई बताउनुभयो ।

वडा नं. ७ मा वडाध्यक्ष गिरी सहित वडा सदस्यहरु मुम बहादुर पाण्डे, हरि शंकर पौडेल, सावित्रा थारु र पार्वती सुनारको जनप्रतिनिधिको टिमले सक्रियता पुर्वक वडावासीको चाहाना अनुरुप काम गर्नका लागि खटिरहेको वडावासी तथा विभिन्न संघ संस्थाका प्रतिनिधिहरुले लुम्बिनी दर्पणलाई बताएका छन् ।