लुदस, कपिलवस्तु
नगरको गतिविधिमा आधारित बाणगंगा नगरपालिकाको अन्तिम सार्वजनिक सुनुवाइ कार्यक्रम सम्पन्न भएको छ । बाणगंगा नगरपालिकाको आयोजना र नेपाल पत्रकार महासंघ कपिलवस्तु शाखाको सहजीकरणमा भएको कार्यक्रममा उपस्थित नगरवासिले शिक्षा, स्वास्थ्य, कृषि, नगरका योजना, विपन्न सुरक्षा आवास, टोल विकास संस्था र बडघरको समन्वय, स्वास्थ्य विमामा भोगेका समस्या लगायत बिषयमा जिज्ञासा तथा सल्लाह सुझाव राखेका थिए । नगरले गरेका राम्रा कामको समेत प्रशंसा गर्दै निरन्तरता दिनुपर्नेमा जोड दिएका थिए ।
सार्वजनिक सुनुवाई कार्यक्रममा उठेका प्रश्नको सम्बोधन गर्दै वाणगंगाका नगरपालिकाका नगर प्रमुख चक्रपाणी अर्यालले सेवाग्राीको गुनासो र सुझाव सकारात्मक रहेको बताउदै नगरवासीलाई प्रभावकारी र गुणस्तरीय सेवा प्रवाहमा नगरपालिका निरन्तर लागिरहेको बताउनुभयो । प्रमाण विना तथ्यहिन बोलेका कुरामा भन्दा नगरको रचनात्मक काम सँगै नगरको सम्रग विकासमा जोड दिएको समेत उहाँले बताउनु भयो । नगर प्रमुख अर्यालले नगरमा हुने सेवा प्रवाह सुविधामा सबै जनप्रतिनिधि कर्मचारी एक भएर काम गरेको बताउदै नगरबाट हुने सेवा प्रवाहमा कतै समस्या देखिएमा त्यसलाई सुधार गर्दैै अगाडी बढ्ने दावी समेत गर्नु भयो । नगरबासिको हित, विकास, योजना, समृद्धि, सुशानको लागि निरन्तर सेवामा लागि रहेको बताउदै नगरपालिकामा जनप्रतिनिधी र कर्मचारीले जिम्मेवार भएर काम गरिरहेको तर्क गर्नु भयो ।
सार्वजनिक सुनुवाइ कार्यक्रममा उप प्रमुख रिता कुमारी चौधरीले बोल्दै राज्यले संचालन गरेका सेवा प्रवाहलाई सरल र सहज बनाउदै नगरमा सेवाग्राही नागरिकलाई सन्तुष्टि प्रदान गर्ने गरि काम गरेको बताउनुभयो । नगरका प्रमुख प्रशासकिय अधिकृत भक्तिराम मरासिनीले स्वागत मन्तव्य राख्दै नगरले गरेको कामको बारेमा बताउँदै वित्तिय र भौतिक प्रगतिको बारेमा समेत जानकारी गराउनु भएको थियो । यस्तै उहाँले नगरबासिका उठेका प्रश्नलाई सम्बोधन गर्दै वडा तथा पालिका तहमा अल्पकालिन र दीर्घकालिन योजना बनाएर छाडा चौपायाको व्यवस्थापन समेत भइरहेको बताउनुभयो ।
यता नेपाल पत्रकार महासंघ कपिलवस्तु शाखाका उपाध्यक्ष हरि अधिकारीले नागरिक र बहिर्गमन प्रतिबेदन मार्फत कार्यालयको सेवा प्रवाह, राम्रा पक्ष तथा सुधार गर्नुपर्ने विषयमा सेवाग्राही नागरिकको समष्टीगत तथ्यांक प्रस्तुत गर्नुभएको थियो ।
कार्यक्रममा वडाध्यक्षहरु, कार्यपालिका सदस्य, अन्य जनप्रतिनिधि, विभिन्न शाखा प्रमुखहरु, कर्मचारी, टोल विकास संस्थाका अध्यक्ष तथा प्रतिनिधि, नगरवासी, पत्रकार लगायतको उपस्थिति रहेको थियो । नगरको शभाहलमा भएको कार्यक्रमको सञ्चालन सञ्चारकर्मी सागर विकले गर्नु भएको थियो ।
