प्रधानमन्त्री केपी शर्मा ओलीले आपराधिक घटनामा संलग्न भए पूर्वराजा ज्ञानेन्द्र शाहले पनि उन्मुक्ति नपाउने बताएका छन् । सोमबार (चैत १८) प्रतिनिधिसभा बैठकमा सम्बोधनक्रममा उनले यही चैत १५ गते काठमाडौंमा राजावादीको हिंसात्मक प्रदर्शनप्रति संकेत गर्दै यस्तो बताएका हुन् ।
“आपराधिक घटनमा संलग्न कसैले पनि उन्मुक्ति पाउँदैन, पाउनु हुन्न । यसमा पूर्व राजा शाहले पनि उन्मुक्ति पाउनु हुन्न,” प्रधानमन्त्री ओलीले भने ।
उनले पूर्वराजा शाहले गएको फागुन ७ गते आफू ‘अघि बढ्ने, साथ देऊ’ भन्दै वक्तव्यबाजी गरेर भड्काउने कार्य सुरु गरेको बताए । त्यसलगत्तै ठाउँठाउँमा स्वागत कार्यक्रम राख्दै जनता भड्काउने कार्य गरिएको उनले जिकिर गरे । गएको फागुन २५ गते ‘कथित स्वागत–सवारी’ आयोजना यसैको उदाहरण भएको उनले बताए ।
“चैत १४ गते समाज बिथोल्न लागिपरेका एकजना अवाञ्छित व्यक्तिलाई आफ्नै निवासमा डाकेर कथित ‘जनकमान्डर’ तोक्नुभयो र हिंसात्मक वारदातका लागि खटाउनुभयो,” प्रधानमन्त्री ओलीले भने ।
