राप्ती गाउँपालिका दाङ र तानसेन नगरपालिका पाल्पा बीच असल अभ्यास आदान–प्रदान कार्यक्रम सफलतापूर्वक सम्पन्न भएको छ। स्थानीय शासनमा राम्रो अभ्यासका नमुनाहरू साझा गर्ने उद्देश्यले सम्पन्न यस कार्यक्रममा दुबै पक्षका जनप्रतिनिधि तथा कर्मचारीहरूको सक्रिय सहभागिता रहेको थियो।
कार्यक्रमका क्रममा राप्ती गाउँपालिकाको प्रतिनिधिमण्डलले तानसेन नगरपालिकाको सेवा प्रवाह, सुशासन अभ्यास, योजना व्यवस्थापन, बजेट कार्यान्वयन प्रक्रिया, सूचना प्रविधिको प्रयोग र जनसहभागिता अभिवृद्धिका प्रयासहरूबारे प्रत्यक्ष अवलोकन गरेको थियो। साथै, दुबै निकायबीच अनुभव साटासाट, कार्यपद्धति तुलना र भावी सहकार्यको सम्भावनाबारे पनि छलफल गरिएको थियो।
तानसेन नगरपालिकाका प्रमुख प्रशासकीय अधिकृत, योजना शाखा प्रमुख, सूचना अधिकारीलगायतका पदाधिकारीहरूले नगरपालिकाको प्रमुख अभ्यासहरू प्रस्तुत गर्दै, पारदर्शी र प्रभावकारी स्थानीय शासनमा अपनाइएका उपायहरूबारे जानकारी गराएका थिए।
कार्यक्रमको अन्त्यमा दुवै पक्षले एकअर्काको उत्कृष्ट अभ्यासको सम्मान गर्दै स्मृति चिह्न आदानप्रदान गरेका थिए।
स्थानीय तहहरूबीच यस्ता सकारात्मक अभ्यास साटासाट कार्यक्रमहरू सुशासन, पारदर्शिता र सेवा प्रवाहमा अझ सुधार ल्याउन सघाउने विश्वास व्यक्त गरिएको थियो।