हरि आचार्य, कपिलवस्तु
वातावरणमैत्री तथा प्रविधिमैत्री यातायात सेवाको विस्तार गर्ने उद्देश्य सहित शुभयात्रा ई.मोबिलिटी प्रा.लि.कपिलवस्तुले आफ्नो औपचारिक सेवा शुभारम्भ गरेको छ । संस्थाले ई.ड्राईभ लुम्बिनीसँगको सहकार्यमा मोबाइल एपमार्फत सञ्चालन हुने विद्युतिय सवारी सेवा सुरु गरेको हो ।
बाणगंगा नगरपालिकाका १० जना युवाहरूको करिब ५ करोड रुपैयाँ लगानीमा पाँच वटा विद्युतिय कारमार्फत व्यवसायको सुरुवात गरिएको कम्पनीले जनाएको छ। आधुनिक प्रविधिको प्रयोग गर्दै मोबाइल एपमार्फत यात्रुहरूले सहज रूपमा सेवा लिन सक्ने व्यवस्था गरिएको छ ।
कार्यक्रमका प्रमुख अतिथी बाणगंगा नगरपालिकाका मेयर चक्रपाणि यर्यालले विद्युतीय सवारी सेवाको विस्तारले वातावरण प्रदूषण न्यूनीकरणमा महत्वपूर्ण योगदान पु¥याउने विश्वास व्यक्त गर्दै यसले नगरको समृद्धि, दिगो विकास तथा नागरिकलाई गाउँदेखि शहरसम्म सुरक्षित, भरपर्दो र सहज यातायात सुविधा उपलब्ध गराउने बताउनुभयो। उहाँले सेवाको प्रभावकारी विस्तारका लागि सञ्चालकहरूले व्यापक प्रचारप्रसार गर्नुका साथै सर्वसाधारणलाई मोबाइल एप प्रयोग सम्बन्धी जानकारी र अभिमुखीकरण दिनुपर्ने आवश्यकता औंल्याउनुभयो ।
त्यस्तै, शुभयात्रा ई. मोबिलिटी प्रा.लि.का अध्यक्ष मनोज पौडेलले हाल पाँच वटा विद्युतीय कार मार्फत सेवा सुरु गरिएको भए पनि निकट भविष्यमा चार्जिङ स्टेशन स्थापना, थप विद्युतिय सवारी साधन सञ्चालन तथा मोटरसाइकलमार्फत समेत सेवा विस्तार गर्ने योजना रहेको जानकारी दिंदै सन्चालक हरुले भविष्यमा ठूला गाडिसहितको टुर्स एन्ड ट्राभल्सको परिकल्पना समेत रहेको बताउनुभयो । उहाँले कपिलवस्तुलाई स्वच्छ, सुरक्षित र आधुनिक यातायात सेवासँग जोड्ने लक्ष्यका साथ कम्पनी अघि बढिरहेको बताउनुभयो ।
कार्यक्रममा विभिन्न संघसंस्था, व्यवसायी, बुद्धिजीवी, सञ्चारकर्मी तथा स्थानीयवासीहरूको उल्लेखनीय सहभागिता रहेको थियो । सहभागीहरूले युवाहरूको लगानीमा सुरु भएको यस नवप्रवर्तनकारी सेवाले जिल्लाको यातायात क्षेत्रमा नयाँ सम्भावना सिर्जना गर्ने विश्वास व्यक्त गरेका थिए ।
