हरि आचार्य, कपिलवस्तु
सामुदायिक वनको विकास र प्रवद्र्धन गर्न ढिलाई भएको लुम्बिनी प्रदेश सभा सदस्य बिष्णु पन्थीले बताउनुभएको छ । मनकामना सामुदायिक वन उपभोक्ता समुह बाणगंगा १ र २ कपिलवस्तुको १८ र्औ बार्षिक साधारण सभालाई सम्बोधन गर्दै सांसद पन्थीले सामुदायिक वनको विकास र प्रवद्र्धन पहिले देखि नै गर्नुपर्नेमा अल्लि पछि सुरु गरिएको बताउनुभयो । कार्यक्रमका प्रमुख अतिथि समेत रहनुभएका सांसद पन्थीले सामुदायिक वनको विकास, प्रवद्र्धन र सदुपयोग सबै सरोकारवालाहरु मिलेर गर्न आवश्यक रहेको बताउनुभयो । सांसद पन्थीले सामुदायिक वनले अब रासायनिक नभई प्राङगारिक मल उत्पादनमा जोड दिनुपर्ने बताउनुभयो । पन्थीले वनको विकास मानवको जिवनसंग जोडिएकाले मानिसका लागि मात्र नभई हरेक जिवित प्राणिहरुका लागि वन आवश्यक पर्ने बताउनुभयो ।
त्यस्तै बाणगंगा नगरपालिकाका प्रमुख चक्रपाणि अर्यालले बाणगंगा नगरपालिकाका सामुदायिक वनमा आर्थिक अनियमितता, अपारदर्शिता नरहेको बताउनुभयो । कार्यक्रमका विशिष्ठ अतिथि समेत रहनुभएका नगर प्रमुख चक्रपाणि अर्यालले नगरपालिकाले प्रत्येक बर्ष सामुदायिक वनको अनुगमन गरेको बताउदै कुनै पनि अनियमितता नरहेको बताउनुभयो । उहाँले नगरपालिका सामुदायिक वनसंग हातेमालो गरेर विकासका काममा अगाडि बढ्ने बताउनुभयो ।
त्यस्तै बाणगंगा नगरपालिकाका प्रवक्ता तथा वडा नंं. २ का वडाध्यक्ष बिष्णु प्रसाद पौडेलले वडाका सामुदायिक वनहरुसंग वडा कार्यालय जोडिएर काम गरिरहेको बताउनुभयो ।
बाणगंगा खानेपानी तथा सरसफाई संस्थाका अध्यक्ष विश्व कार्की, वैज्ञानिक वन महासंघ अध्यक्ष रेनु सेन, नवजागृती सामुदायिक वनका अध्यक्ष हेमनाथ ज्ञवाली लगायतले मन्तब्य राख्दै मनकामना सामुदायिक वनले विभिन्न विकासका कार्यहरु गरेको बताउनुभयो ।
सामुदायिक वनले आर्थिक बर्ष २०८२/८३ का लागि ६ करोड ४६ लाख ९ हजार ७ सय पचास बराबरको अनुमानित बजेट विनियोजन गरेको छ ।
सामुदायिक वनका अध्यक्ष मुक्त बहादुर कार्कीले काठजन्य उत्पादनको उचित उपयोग र वितरणमा पारदर्शिता कायम गरिएको, वातावरण संरक्षण, जैविक विविधता, संरक्षण, र वन आगलागी नियन्त्रणमा सदस्यहरूको सक्रिय सहभागिता उल्लेखनीय रहेको बताउनुभयो । अध्यक्ष कार्कीले समाजसेवा र सामुदायिक विकासका क्षेत्रमा पनि हाम्रो समूहले विद्यालय सहयोग, बाटो मर्मत, तालीम तथा जनचेतनामूलक कार्यक्रम सञ्चालन गरी स्थानीय विकासमा योगदान पुर्याएको बताउनुभयो ।
साधारण सभामा अध्यक्ष मुक्त बहादुर कार्कीले प्रस्तुत गरेको प्रतिवेदन, सचिव गंगा कुमारी भट्टराईले प्रस्तुत गरेको प्रगति प्रतिवेदन, कोषाध्यक्ष लक्ष्मी थारुले प्रस्तुत गरेको आर्थिक प्रतिवेदन पारित भएका छन् । वनका उपाध्यक्ष पुष्कर घिमिरेको स्वागत तथा सचिव गंगा कुमारी भट्टराईको संचालनमा सम्पन्न कार्यक्रममा उपभोक्ता, विभिन्न संघ संस्थाका प्रमुख प्रतिनिधिहरुको उपस्थिती रहेको थियो ।
