मोहन बेल्वासे
१६ औं कपिलवस्तु महोत्सवको मन्चभागमा आज देशको सांसद भवनभित्र जस्तै नमूना युवा संसद अभ्यास तथा प्रस्तुतिकरण कार्यक्रम सम्पन्न भयो । झट्ट हेर्दा अनौठो लाग्ने नयाँ बानेश्वरको संसद भवनजस्तै एकाएक रोमान्चित दृश्य देखियो ।
जहाँ विद्यार्थी सांसदहरूले संसदको अभ्यास गरेका थिए । कोही आफ्नो जातीय पोसाकमा पनि सजिएका थिए भने सभामुखको दायाँतिर प्रधानमन्त्री, मन्त्रीहरु र सत्ता पक्ष बसेका थिए भने देब्रेतिर प्रतिपक्षका सांसदहरु लहरै बसेका थिए ।
संसदहलमा जब बैठक सुचारु भएको जनाउ घण्टी बज्छ । हल बाहिर भएका माननीयज्यूहरुको पनि हलभित्र प्रवेश हन्छ । लगत्तै हलमा सांसद, प्रधानमन्त्री, मन्त्री, मर्यादापालक, दर्शकदीर्घामा रहेका सबै एकैसाथ उभिन्छ्न् ।video 2
सँगै राष्ट्रिय गान पनि बज्छ । सभामुखले संसदको क्रमशः शून्य र विशेष समय सुरू भएको जानकारी गराएपछि सांसदहरुलाई बोल्न एक मिनेट र तीन मिनेटको समय दिन्छ ।
सांसदहरुले देशको समसामयिक राजनैतिक घटनाक्रम, विकास निर्माण, रोजगारी,युवा नीति निर्माण, सामाजिक विकृति र विंसंगति, लागूपदार्थ दुर्व्यसनी, युवा सीप रोजगार, युवामा सूचना प्रविधिको पहुँच, संचार क्षेत्रमा सरकारले गरेको दमन,युवा क्लबको क्षमता विकास, छुवाछूत तथा लैंङ्गिक विभेद, दाइजोप्रथा, विद्यार्थीको सेवा सुविधा, युवा स्वरोजगार कार्यक्रम,साइवर क्राइम र यसको नियन्त्रण, प्रजनन स्वास्थ्यलगायतका क्षेत्रमा सरकारको काम आफ्नो धारणा तथा प्रश्नहरु राखे ।
त्यसपछि प्रधानमन्त्री र मन्त्रीहरुले सम्बन्धित सांसदहरुले सोधेको प्रश्नको जवाफ दिन थाले । संसद बैठकजस्तै देखिने यो दृश्य भने होराईजन आवासिय विद्यालय सिद्धिपुर कपिलवस्तुले महोत्सवकै ईतिहासमा देखाएको नयाँ दृश्य थियो पहिलो पटक महोत्सवमा प्रस्तुत गरेको नमुना संसद अभ्यास तथा प्रस्तुतीकरण कार्यक्रमको रोचक अनि नेतृत्व पंक्तीले हेर्न लायक र संदेशमुलक थियो ।
विद्याथीहरुको प्रस्तुति हाल देशमा भएको गतिविधि संग संम्बन्धीत गहकिलो भूमिका साह्रै लोभ लाग्दो रहेको थियो । सदनमा सबैको प्रतिनिधित्व हुने गरी समावेशी मन्त्रीपरिषद गठन गरिएको थियो ।
सहभागीहरुले मर्यादित भएर आफ्ना कुराहरु कसरी राख्ने, सत्ता पक्ष र विपक्षीबाट प्रश्न आउँदा कसरी जवाफ दिनेलगायतका यावत कुराहरु सिकाइ भएको र सबै पक्षलाई समेटेर कसरी टिमको नेतृत्व गर्ने भन्ने सिकाई भएको बताएका छन् ।
होराईजन आवासिय मा.वि सिद्धिपुरका प्रिन्सिपल बासुदेव घिमिरेले भविष्यमा विद्यार्थीहरुले नै देशको भविष्य निर्माण गर्ने र नेतृत्व गर्ने भएकोले त्यो क्षमताको जग निर्माण गर्न पनि अभ्यास आवश्यक रहेको बताएका थिए । विद्यार्थीलाई संसदको स्थापना र अभ्यासमा अग्रसर बनाउदै राज्यलाई सुझाव दिन सक्ने युवा तयार पर्नाको यो अभ्यास विद्यार्थी र नेतृत्वपंक्तीलाई अति आवश्यक देखिन्थ्यो । युवा अवस्थामा यस्तो खाले तालीम प्रयोगात्मक हुदा युवालाई देशको नितिनिमार्णमा समेत सहज भुमिका खेल्न सक्ने विश्वास व्यक्त गरिएको छ ।
