लुदस, जीतपुर
भारतको चण्डीगढमा उपचारका लागि जाने क्रममा अकस्मात् निधन भएका स्वर्गीय रामबहादुर बी.सी.का परिवारलाई माइती पक्ष तथा कपिलवस्तुमा रहेका लेखाली दाजुभाइहरूले आर्थिक राहत उपलब्ध गराएका छन्।
स्वर्गीय बी.सी. साबिक अर्घाखाँची जिल्ला, शितगंगा नगरपालिका–१३ का स्थायी बासिन्दा हुन्। हाल उनी कपिलवस्तुको बाणगंगा नगरपालिका–१, बुङ्चीमा बसोबास गर्दै आएका थिए। गत असार १८ गते उपचारका लागि भारतको चण्डीगढ बाट उपचारका लागि अस्पताल तर्फ जाँदै गर्दा उनको दुःखद निधन भएको थियो।
उनको निधनको नवौं दिनको पुण्यतिथिका अवसरमा कपिलवस्तुमा रहेका लेखाली दाजुभाइहरूको पहलमा संकलित रु. १ लाख ७२ हजार २ सय १० बराबरको चेक उनकी श्रीमती हिराकला भाट (बी.सी.) लाई हस्तान्तरण गरिएको हो।
परिवारका अनुसार स्वर्गीय बी.सी. लामो समयदेखि भारतको चण्डीगढ क्षेत्रमा रोजगारी गर्दै आएका थिए। विगत पाँच–छ वर्षदेखि मिर्गौला रोगबाट पीडित रहेका उनी नियमित डायलाइसिस गराउँदै आएका थिए। मृतकका एक छोरी र दुई छोरा रहेका छन्। परिवारको आर्थिक अवस्था कमजोर भएकाले उनको निधनपछि परिवार थप समस्यामा परेको मृतकका दाजु खिमबहादुर बी.सी. ले जानकारी दिए।
दाजु खिमबहादुर बी.सी.का अनुसार क्रियाकर्म सम्पन्न गर्न तथा आगामी दैनिक खर्च व्यवस्थापनमा केही राहत पुग्ने उद्देश्यले उक्त आर्थिक सहयोग संकलन गरी परिवारलाई हस्तान्तरण गरिएको हो।