जेठ २२, भैरहवा ।
सम्पूर्ण प्राणीको अस्तित्व बचाउन प्रकृतिलाई अनुकुल बनाई वातावरणको रक्षा गर्नु पर्ने लुम्बिनी प्रदेशका उद्योग, वन तथा वातावरण मन्त्री कल्पना पाण्डेले बताएकी छिन् ।
प्रकृति अनुकुल बनाउन सबैले वृक्षारोपण गर्नुपर्ने उनले बताइन् । सम्पूर्ण प्राणीको जीवन वातावरणमा निर्भर रहेकाले मानवीय क्रियाकलाप वातावरण रक्षामा केन्द्रित गर्न उनले सबैलाई आग्रह गरिन् । विश्व वातावरण दिवसको अवसरमा बेलहिया बुटवल व्यापारीक मार्ग स्थित ओमशतिया गाउँपालिका क्षेत्रमा वृक्षारोपणको सुभारम्भ गर्दै मन्त्री पाण्डेले सन्तुलित वातावरणको निर्माण गर्न प्राकृतिक सम्पदाहरुको सही सदुपयोग गर्नुपर्ने बताइन् । प्रकृति, वातावरण र मानिसका विच एकदमै घनिष्ट सम्बन्ध छ । तर आज मानिसले आफुलाई आवश्यक पर्ने प्राकृतिक स्रोतको उपयोग गर्दा वातावरणलाई कति असर गरेको छ त्यो ख्याल गर्दैनन् । यसले भुक्षय, बाढी, पहिरो, खडेरी, अतिवृष्टि जस्ता समस्या निम्त्याएको छ । मन्त्री पाण्डेले भनिन् । सबैजनाले घरमा कम्तिमा एउटा रुख रोपे वातावरण सन्तुलन हुँदै जानेछ उनले बताइन् । भौतिक विकास अपरिहार्य भएकाले अब प्रदेश सरकारले विकास सँगसँगै वातावरण संरक्षणको काम पनि सँगै गर्ने मन्त्री पाण्डेले बताइन् । हो विकास निर्माणका काम गर्दा प्राकृतिक सम्पदाहरु नसिदै गइरहेका छन् । अब प्रदेश सरकारले विकास निर्माणका काम गर्दा हुने क्षति, निर्माण सकिएपछि वृक्षारोपण, प्राकृतिक जलाधार क्षेत्रहरुको निर्माण तथा संरक्षण गरि वातावरण अनुकुल हुने काम अगामी वर्षबाट सुरु गर्ने उनले बताइन् ।
कार्यक्रममा बोल्दै उद्योग, बन तथा वातावरण मन्त्रालयका सचिव राजेन्द्र केसीले प्रतिकुल वातावरणलाई अनुकुल बनाउन वृक्षारोपण सबैभन्दा उपयोगी भएकाले मन्त्रालयले हरेक वर्ष वृक्षारोपण गरेर कार्यक्रम गर्ने गरेको बताए । वातावरण विनाश भए मानिसको अस्तित्व सङ्कटमा पर्ने भएकाले रुख विरुवाको संचय गर्नुपर्ने उनले बताए । मानिसले प्राकृतिक स्रोतमा गरेको अत्याधिक दोहनले सम्पूर्ण जीवको जीवन सङ्कटमा परेको महाशाखा प्रमुख दिपक ज्ञवालीले बताए । भौतिक विकास र विकास निर्माणका काम वातावरण अनुकुल भए अहिले देखिएका प्राकृतिक समस्याहरु आधा कम हुने विज्ञहरुको दाबी छ । विश्व वातावरण दिवसमा यो वर्षको नारा ‘नयाँ सोच र सिर्जना, प्राकृतिक प्रणालीको पुर्नस्र्थापना’ भन्ने थियो