हरि आचार्य, कपिलवस्तु
नेपाल कम्युनिष्ट पार्टी (एमाले) का केन्द्रिय सदस्य गिरधारीलाल न्यौपानेले एमालेले सत्ता, सरकार र सिंह दरबार त्याग्न तयार रहेको तर जनता त्याग्न कहिल्लै तयार नहुने बताउनुभएको छ । पार्टीको जनवर्गीय संगठन राष्ट्रिय युवा संघ नेपाल कपिलवस्तुको १० औँ जिल्ला अधिवेशनलाई सम्बोधन गर्दै नेता न्यौपानेले पार्टीको अमुल्य सम्पति सम्पुर्ण जनता रहेको बताउनुभयो । पार्टीका कृषि तथा पशुपंक्षी विभाग प्रमुख समेत रहनुभएका नेता न्यौपानेले एमाले बाहेकका अन्य कम्युनिष्ट पार्टी कांग्रेसको पाउमा जानु लज्जास्पद रहेको बताउनुभयो ।
उहाँले देशमा एमाले बाहेकका अन्य दलको सत्तामोह गठबन्धन र एमाले गरि दुई धुर्वको राजनिति भईरहेको बताउदै एमालेलाई हराउने गठबन्धनको सिद्धान्त रहेकाले त्यसलाई सबै मिलेर चिर्नुपर्ने बताउनुभयो । नेता न्यौपानेले माओवादी केन्द्र, एकीकृत समाजवादी गठबन्धन टुटे पछि विलय हुने डरले जस्तोसुकै देश, जनता तथा पार्टी विरुद्ध पनि काम गर्न तयार रहेको बताउनुभयो ।
उहाँले गठबन्धन टुट्ने डरले जनताको माग र आवश्यकता विरुद्ध जाने सत्तामोह पार्टीहरुलाई अब स्थानीय तहको निर्वाचनमा जनताले परिणाम देखाउने बताउनुभयो ।
न्यौपानेले पार्टीलाई मजबुत र बलियो बनाई समृद्ध देश निर्माणका लागि राष्ट्रिय युवा संघ नेपालको अहम भुमिका रहेको बताउनुभयो । अब जनताहरुका आधारभुत आवश्यकता पुरा सुखी नेपाली, समृद्ध नेपालीको सपना पुरा गर्न एमालेको विकल्प नरहेको उहाँले बताउनुभयो ।
न्यौपानेले ५ दलीय गठबन्धन संग एक्लै लड्न सक्ने क्षमता एमालेसंग भएकाले कुनै पनि पार्टीसंग गठबन्धन गरेर चुनावमा जाने कुरा अफवाह मात्र रहेको बताउनुभयो ।
