हरि आचार्य, कपिलवस्तु
कपिलवस्तुको बाणगंगा नगरपालिका ८ स्थित नवप्रभात सामुदायिक वन उपभोक्ता समूहको १४ औं वार्षिक साधारण सभा सम्पन्न भएको छ । समुहको घाटगद्धी स्थल बण्डौलिमा उक्त साधारण सभा सम्पन्न भएको हो । साधारण सभामा समुहले अहिले सम्म गरेका क्रियाकलापसंगै आगामी नीति, कार्यक्रम तथा बजेटको बारेमा वनका अध्यक्ष डिल्लीराज रेग्मीले स्पष्ट पार्नुभएको थियो । उहाँले अघिल्लो आर्थिक बर्षमा वन संरक्षणसंगै महिला सशक्तिकरण, अति विपन्न गरिव आवास निर्माण, विपन्नलाई आर्थिक विकाससंगै विभिन्न खालका क्षमता विकास कार्यक्रमहरु सञ्चालन गरिएको बताउनुभयो । अध्यक्ष रेग्मीले साधारण सभा सफल पार्न सहयोग गर्नुहुने सम्पुर्णमा धन्यवाद ज्ञापन गर्नुभएको थियो ।
त्यस्तै सभामा समुहका कोषाध्यक्ष लक्ष्मी भुसालले आर्थिक प्रतिवेदन, सचिव सिता भुषाल (पाण्डे) ले वार्षिक प्रगति प्रतिवेदन प्रस्तुत गर्नुभएको थियो ।
कार्यक्रमका प्रमुख अतिथि बाणगंगा नगरपालिकाका प्रमुख चक्रपाणि अर्यालले वन क्षेत्रको संरक्षणमा सामुदायिक वनको महत्तवपूर्ण भूमिका रहेको बताउँदै वनको सही व्यवस्थापन र संरक्षणका लागि सबै उपभोक्ताहरूको सक्रिय सहभागिता आवश्यक रहेकोमा जोड दिनुभयो । नगर प्रमुख नगरपालिकाले वनको संरक्षण र विकासमा निरन्तर सहयोग पुर्याउने प्रतिबद्धता पनि व्यक्त गर्नुभयो । उहाँले वनले नीति, कार्यक्रम बजेट बनाउँदा नगरपालिकासंग समन्वय गर्न आवश्यक रहेको बताउनुभयो ।
कार्यक्रमका विशिष्ठ अतिथि डिभिजन वन कार्यालय कपिलवस्तुका वरिष्ठ वन अधिकृत शिव नन्द शाहले वनको दीर्घकालीन संरक्षण र व्यवस्थापनका लागि जनताको सहभागिता अपरिहार्य भएको बताउँदै यस क्षेत्रमा वनले गरेको योगदानको प्रशंसा गर्नुभयो ।
वार्षिक साधारण सभामा स्थानीय स्वास्थ्य संस्थालाई आवश्यक सामग्री वितरण, जेष्ठ नागरिकहरूलाई सम्मान र खेलकुद सामग्री पनि वितरण गरिएको थियो । यसले समुदायको विभिन्न पक्षलाई लाभ पुर्याएको भन्दै सहभागीहरूले प्रशंसा व्यक्त गरेका थिए ।
कार्यक्रममा बाणगंगा ८ का वडाध्यक्ष बाबुराम अर्याल, जनप्रतिनिधि, वनका पुर्व अध्यक्षहरु, राजनैतिक दलका प्रतिनिधि, समाजसेवी, विभिन्न संघसंस्थाका प्रतिनिधि, पत्रकार तथा उपभोक्ताहरूको उपस्थिति रहेको थियो ।
