हरि आचार्य, कपिलवस्तु
ईलाका प्रहरी कार्यालय पिपराले नागरिक सुनुवाई कार्यक्रम सम्पन्न गरेको छ । प्रहरीले बाणगंगा नगरपालिका वडा नं.२ को वडा कार्यालयमा उक्त कार्यक्रम सम्पन्न गरेको हो ।
सो कार्यक्रममा नागरिक स्तरबाट सवारी दुर्घटना, लागुपदार्थ दुव्र्यसनी, नदीजन्य पदार्थको अवैध दोहन, लेनदेन, चोरीतस्करी, नागरिक प्रहरी सम्बन्ध, शान्ति सुरक्षा लगायतका विषयमा प्रश्न उठेका थिए । प्रश्नहरुका जवाफ दिदैं ईलाका प्रहरी कार्यालय पिपराका प्रमुख लोकेन्द्र जिसीले पछिल्लो समय बाणगंगामा बालबालिका हराउने समस्या देखिन थालेको बताउनुभयो ।
उनले हराउनेहरुमा अधिकांश किरोरीहरु रहेको भन्दै यस्ता समस्या सिर्जना हुन नदिन अभिभावक सचेत हुनुपर्ने बताउनुभयो । उहाँले बाणगंगालाई अब लागुपदार्थ दुव्र्यसनीको हवका रुपमा परिभाषित गर्न नहुने बताउनुभयो । अहिले पनि विभिन्न कार्यक्रम र समारोहहरुमा बाणगंगालाई लागुपदार्थ दुव्र्यसनीको हव भनिदैं आएकोमा यसले नागरिकमा नकारात्मक सन्देश जाने भएकाले अहिले त्यस्तो अवस्था नभएको भन्दै सेवनकर्ता र ओसारपोसार गर्नेको संख्या उल्लेख्य मात्रामा घटेको बताउनुभयो । उहाँले बाणगंगामा लागुऔषध ओसारपोसार र सेवनमा क्रमशः घट्दै आएको तथ्यांकले देखाएको बताउनुभयो ।
लागुपदार्थ दुव्र्यसनी नियन्त्रणको क्षेत्रमा ईलाका प्रहरी कार्यालयले उल्लेखनीय काम गरेको उहाँले दाबी गर्नुभयो ।
उहाँले बाणगंगाका भित्रि सडकहरु साँधुरो हुँदा दुर्घटना हुने गरेको बताए । मुख्य बजार क्षेत्रमा सिसिटिभि क्यामेरा जडान गरिए पनि त्यो पर्याप्त र गुणस्तरिय नभएको स्वीकार गर्दै उनले उच्च स्तरको सिसिटिभि क्यामेरा जडान गर्न आवश्यक पहल गर्दै आएको बताउनुभयो । प्रहरीको संख्या सिमित मात्रामा रहेकाले आमनागरिकलाई अपेक्षित रुपमा शान्ति सुरक्षाको प्रत्याभूति दिलाउन चुनौति देखिएको उहाँले बताउनुभयो । यद्यपी बाणगंगामा अन्य पालिकाको तुलनामा शिक्षित वर्गको बसोबास रहेकाले उजुरीको संख्या कम नै रहेको उहाँको भनाई छ । प्रहरीले आफ्नो काम, कर्तव्य र अधिकार दृढताका साथ निर्वाह गरिरहेको उनले जिकिर गर्नुभयो ।
कार्यक्रमका प्रमुख अतिथि बाणगंगा नगरपालिकाका प्रवक्ता तथा वडा नं.२ का वडाध्यक्ष विष्णु प्रसाद पौडेलले यस क्षेत्रमा शान्ति सुरक्षा कायम गर्न ईलाका प्रहरी कार्यालय पिपराले उदाहरणीय काम गर्दै आएको भन्दै खुशी व्यक्त गर्नुभयो ।
उहाँले सम्भावित घटनाहरु नियन्त्रण गर्न आवश्यक सुचनाहरु आमनागरिकले प्रहरीलाई दिई नागरिकको कर्तव्य निर्वाह गर्नुपर्ने बताउनुभयो । प्रहरी र नागरिकस्तरको सहकार्यबाट नै सभ्य समाजको निर्माण सकिने उहाँको भनाई छ ।
कार्यक्रममा ईलाका प्रहरी कार्यालय पिपराले चालु बर्षमा गरेका उपलब्धिहरुको बारेमा जानकारी दिंदै सुझाव समेत संकलन गरिएको थियो ।
