हरि आचार्य, कपिलवस्तु
कपिलबस्तुको बाणगंगा २ पिपरामा अवस्थित हिलबर्ट ईङ्गलीस बोर्डिङ्ग स्कुलमा खेल सप्ताह सुरु भएको छ । ‘एकताबद्ध देश खेलकुदको सन्देश’ भन्ने मुल नाराका साथ सुरु भएको खेल सप्ताहको बाणगंगा नगरपालिकाका नगर प्रमुख चक्रपाणि अर्यालले उद्घाटन गर्नुभएको हो ।
कार्यक्रमको उद्घाटन गर्दै बाणगंगा नगरपालिकाका नगर प्रमुख चक्रपाणी अर्यालले खेलकुद कार्यक्रमले विद्यार्थीलाई भविष्यको बाटोतर्फ अगाडि बढ्न टेवा पुग्ने बताउनुभयो । कार्यक्रमका प्रमुख अतिथि समेत रहनुभएका नगर प्रमुख अर्यालले बाणगंगा नगरपालिका शिक्षा क्षेत्रसँगै अतिरिक्त क्रियाकलापमा पनि अगाडि रहेको बताउनुभयो । मेयर अर्यालले बाणगंगा नगरपालिकाले शिक्षा क्षेत्रको गुणस्तरमा सुधार ल्याउन विभिन्न नीतिहरू लागू गर्दै आएको र विद्यार्थीहरूको सर्वाङ्गीण विकासका लागि अतिरिक्त क्रियाकलापलाई प्राथमिकतामा राखेको उल्लेख गर्नुभयो । मेयर अर्यालले बालबालिकाको शारीरिक र मानसिक विकासका लागि खेलकुद र अतिरिक्त क्रियाकलापको माध्यमबाट हिलबर्ट ईङ्गलीस बोर्डिङ्ग स्कुल निकै प्रथमिकताका साथ लागिरहेको बताउनुभयो ।
उहाँले खेलकुदले विद्यार्थीलाई बौद्धिक विकासका साथै शारिरीक विकासमा समेत मद्धत पुग्ने बताउनुभयो । साथै खेलकुदले विद्यार्थी बालबालिकालाई अनुशासित बन्न सहयोग मिल्ने औल्याउनुभयो । नगरप्रमुख अर्यालले बाणगंगा नगरपालिकाका विद्यालयहरु पठनपाठनका साथै अतिरिक्त क्रियाकलापमा पनि अब्बल रहेको दाबी गर्नुभयो ।
कार्यक्रमका क्रममा विद्यालयका प्रिन्सिपल शिवकुमार पोख्रेलले खेलकुद सप्ताहले विद्यार्थीहरूको आत्मविश्वास र टीमवर्कको भावना बढाउन महत्वपूर्ण योगदान गर्ने बताउनुभयो ।
त्यस्तै स्कुलका प्रबन्ध निर्देशक बुद्धिराम पौडेलले खेलकुदले विद्यार्थीहरुमा भएको अन्तरनिहित प्रतिभालाई खेलकुदको माध्यमाबाट प्रस्तुत गरि नगर हुदै जिल्ला तथा देशमै आफ्नो उत्कृष्टता पस्तुत गर्न पाउने बताउनुभयो । उहाले खेलकुदले विद्यार्थीको पठनपाठन मात्रै नभई सर्वागिंण विकासमा सहयोग पुग्ने विश्वास व्यक्त गर्नुभयो ।
लुम्बिनी प्रदेश खेलकुद परिषद सदस्य तथा हिलबर्ट स्कुलका अध्यक्ष दिपक खनालले विद्यार्थीहरुले निकै अनुशासन र सक्रियताका साथ खेलकुदमा सहभागी भएको बताउनुभयो । खेल सप्ताहको उद्घाटन कार्यक्रममा विभिन्न खेल प्रतियोगिताहरूको शुभारम्भ गरिएको छ । विद्यार्थीहरूले फुटबल, क्रिकेट, भलिबल, दौड, लगायतका प्रतियोगितामा सक्रिय सहभागीता जनाएका छन् ।
विद्यालयका एकेडेमिक डाइरेक्टर तथा नेपाली विषय विभाग प्रमुख तेज प्रसाद आचार्यको संचालनमा भएको कार्यक्रममा विद्यालयका इभेन्ट कोर्डिनेटर सन्तोष खनालले स्वागत मन्तव्य राख्नु भएको थियो । कार्यक्रममा साता भरि विभिन्न खेलकुद कार्यक्रम संचालन हुने विद्यालयले जनाएको छ ।
