हरि आचार्य, कपिलवस्तु
नेकपा (एमाले) कपिलवस्तुले यहि कात्तिक २९ गते बाणगंगामा शक्ति प्रदर्शन सहित विशाल जनसभा गर्ने भएको छ । नेकपा (एमाले) बाणगंगा नगरकमिटीको आयोजनामा मंगलबार बाणगंगा नगरपालिका–४ स्थित पंजाबी तड्का रेष्टुरेन्टमा सम्पन्न पालिका स्तरिय जनपरिचालन सभा मार्फत बाणगंगामा हुने शक्ति प्रदर्शन सहित विशाल जनसभाको तयारीबारे जानकारी दिईएको हो ।
सभाका प्रमुख अतिथि नेकपा (एमाले) लुम्बिनी प्रदेश कमिटी सदस्य डम्मर शर्माले सम्बोधन गर्दै नेपालको संवैधानिक निरन्तरतालाई अन्त्य गर्ने, देशमा अराजकता सिर्जना गर्ने, नेपालको अस्मितालाई सिद्याउन खोज्ने विदेशी तप्काहरुका कारण देशका यो अवस्था सिर्जना भएकाले यसको अन्त्य अब नेकपा (एमाले) बाट मात्र सम्भव रहेको बताउनुभयो । प्रदेश कमिटीका सदस्य शर्माले कपिलवस्तुमा एमाले अझै पनि मजबुत रूपमा रहेको छ भन्ने विश्वास दिलाउने समय आएको बताउनुभयो । मंगलबार बाणगंगा नगरपालिका–४ स्थित पंजाबी तड्का रेष्टुरेन्टमा आयोजित पालिका स्तरीय जनपरिचालन भेलामा बोल्दै उहाँले एमाले कमजोर नभई सशक्त पार्टी भएको शक्ति प्रदर्शन मार्फत प्रमाणित गर्नुपर्नेमा जोड दिनुभयो । उहाँले जेन्जी आन्दोलनले देशको संरचना र भौतिक सम्पत्ति नष्ट गर्ने उद्देश्य नभएको तर केही अराजक तत्व र घसु पैठ प्रवेशका कारण त्यसमा क्षति पुगेको दाबी गर्नुभयो ।
त्यस्तै नेकपा (एमाले) बाणगंगा नगर कमिटीका इन्चार्ज चक्रपाणी अर्यालले बाणगंगामा एमाले विना कुनै पनि काम सम्भव नहुने स्थिति देखाउनुपर्ने बताउनुभयो । उहाँले एमाले कमजोर नभई शक्तिशाली संगठन भएको र यसलाई जनसमर्थनका माध्यमबाट झनै सबल बनाउनुपर्नेमा जोड दिनुभयो । देशका सबै नेता कार्यकर्ता एमालेलाई बचाउने दृढका साथ एकतावद्ध भएको बताउनुभयो । एमालेले देशको अस्मिता जोगाउँछ, राष्ट्रियताको सवालमा बलियो भयो भनेर देशी विदेशी शक्तिहरुले गरेको आक्रमणलाई परास्त गर्ने दिन आएको बताउनुभयो ।
सोही अवसरमा एमाले नगर कमिटीका अध्यक्ष सोमनाथ अर्यालले आगामी कार्तिक २९ गते बाणगंगामा हुने शक्ति प्रदर्शनका लागि तीव्र तयारी भइरहेको जानकारी दिनुभयो । उहाँले उक्त प्रदर्शनमा लक्षित पाँच हजार मात्र होइन, त्यसको दोब्बर जनसहभागिता सुनिश्चित गर्न सबै तहका कार्यकर्ताले सक्रिय भूमिका खेल्नुपर्नेमा जोड दिनुभयो ।
भेलामा राष्ट्रिय युवा संघ नेपाल जिल्ला कमिटी कपिलवस्तुका अध्यक्ष तिलक गिरी, भूमि अधिकार मञ्च केन्द्रीय सदस्य पवित्रा नेपाली, अनेम संघ जिल्ला अध्यक्ष शान्ता पाण्डे, राष्ट्रिय जनसांस्कृतिक महासंघका जिल्ला ईन्चार्ज पूर्णचन्द्र परियार, प्रेस चौतारी नेपाल कपिलवस्तुका अध्यक्ष बाबुराम रायमाझी, अखिल नेपाल किसान महासंघ जिल्ला अध्यक्ष रेशम जिसी लगायतले वक्ताले २९ गतेको शक्ति प्रदर्शनलाई भव्य र सफल बनाउन सबै तहका कार्यकर्ताले पूर्ण समर्पणका साथ जुट्ने प्रतिवद्धता व्यक्त गर्नुभयो ।
भेला एमाले नगर कमिटीका अध्यक्ष सोमनाथ अर्यालको अध्यक्षता, उप–सचिव जगत रेग्मीको स्वागत मन्तव्य तथा सचिव चेतनारायण भण्डारीको सञ्चालनमा सम्पन्न भएको थियो । भेलामा एमाले प्रदेश, जिल्ला र नगर कमिटीका सदस्यहरू सहित स्थानीय नेता तथा संयौं कार्यकर्ताको उल्लेखनीय उपस्थिति रहेको थियो ।
