वर्षा खनाल
भगलापुर ।
मन सफा छ, व्यवहार सरल छ,
यही मेरो जीवनको असल फल छ।
कसैको दुःखमा साथ दिन सिकेको छु,
खुसी बाँड्दै आफ्नै बाटो हिँडेको छु।

धनले होइन, मनले ठूलो बन्न खोज्छु,
मानवताको दीप सधैं बलिरहोस् भनी सोच्छु।
कसैलाई चोट दिएर उचाइ चुम्न चाहन्न,
आफ्नो कर्मले मात्र परिचय बनाउन चाहन्छु।

मौन छु कहिलेकाहीँ, घमण्डी ठानिन्छु,
तर मनभित्र सबैका लागि शुभकामना साँचिन्छु।
झुटको सहारा लिएर अगाडि बढ्दिनँ,
सत्यको बाटोमा संघर्षसँग पनि डराउँदिनँ।

अरूको सफलतामा खुसी हुन जान्दछु,
ईर्ष्याको आगोमा कहिल्यै जल्दिनँ।
माया, सम्मान र सद्भावको फूल रोप्दै,
मानवताको बगैँचामा सधैं फुलिरहन्छु।

मन सफा छ, व्यवहार सरल छ,
यही नै मेरो सबैभन्दा ठूलो बल छ।
जीवनको यात्रामा जे जति पाइए पनि,
असल कर्म नै मानिसको अमूल्य फल छ।