बाणगंगा, कपिलवस्तु

 बाणगंगा नगरपालिकाको सहयोग तथा नेपाल पत्रकार महासंघ कपिलवस्तु शाखाको आयोजनामा पत्रकारहरूका लागि  कृत्रिम बुद्धिमत्ता (एआई) सम्बन्धी तालिम शुक्रबारदेखि बाणगंगा नगरपालिका–१ स्थित होटल माछापुच्छ्रेमा सुरु भएको छ।

तालिमको उद्घाटन गर्दै बाणगंगा नगरपालिकाका प्रमुख चक्र अर्यालले सञ्चार क्षेत्रसँग नगरपालिका सधैं सहकार्य गर्न तयार रहेको बताए। उनले चालु आर्थिक वर्षमा पनि नगरपालिकाले मिडिया क्षेत्रको विकासका लागि उल्लेख्य लगानी गरेको जानकारी दिँदै पत्रकारहरूलाई निष्पक्ष, जिम्मेवार र विश्वसनीय पत्रकारितामा केन्द्रित हुन आग्रह गरे।

उद्घाटन सत्रमा बोल्दै नेपाल पत्रकार महासंघ कपिलवस्तु शाखाका पूर्व अध्यक्ष भेषराज पाण्डेले बदलिँदो समय र प्रविधिसँगै पत्रकारहरू पनि प्रविधिमैत्री बन्नुपर्ने आवश्यकता औंल्याए। उनले समाचार संकलन, सम्पादन तथा प्रस्तुतीकरणमा नयाँ प्रविधिको प्रयोगले पत्रकारितालाई थप प्रभावकारी बनाउन सक्ने बताए।

नेपाल पत्रकार महासंघ कपिलवस्तु शाखाका अध्यक्ष डिलाराम भुसालले पत्रकारहरूको क्षमता अभिवृद्धिका लागि महासंघले निरन्तर विभिन्न तालिम तथा प्रशिक्षण कार्यक्रम सञ्चालन गर्दै आएको उल्लेख गरे। उनले एआई प्रविधिबारे ज्ञान हासिल गर्दै पत्रकारितालाई थप व्यावसायिक र प्रभावकारी बनाउन सहभागीहरूलाई आग्रह गरे।

कार्यक्रममा शाखाका कोषाध्यक्ष मोहन बेल्वासेले स्वागत मन्तव्य व्यक्त गरेका थिए भने सह–सचिव कृष्ण पौडेलले सञ्चालन गरेका थिए।

 तालिममा बाणगंगा नगरपालिका तथा आसपासका क्षेत्रका करिब ४० जना सञ्चारकर्मीहरूको सहभागिता रहेको छ। तालिममा पत्रकारितामा एआईको प्रयोग, डिजिटल सामग्री निर्माण, तथ्य परीक्षण, समाचार लेखन तथा विभिन्न प्रविधिमूलक उपकरणहरूको प्रयोगबारे प्रशिक्षण प्रदान गरिने आयोजकले जनाएको छ।