जितपुर । कपिलवस्तुको बाणगङ्गा नगरपालिकाको नयाँ प्रमुख प्रशासकीय अधिकृतका रूपमा ईश्वरीप्रसाद पाण्डेले जिम्मेवारी सम्हालेका छन् । राष्ट्रपति कार्यालयमा कार्यरत रहेका पाण्डे नगरपालिकामा आएसँगै स्थानीय तहको प्रशासनिक कामकाज, सेवा प्रवाह र विकास निर्माणका योजनाले थप गति लिने अपेक्षा गरिएको छ ।
नगरपालिकामा सोमबार उपस्थित भएका पाण्डेलाई नगरप्रमुख चक्रपाणी अर्याल, उपप्रमुख रिता कुमारी चौधरी, नगर प्रवक्ता विष्णुप्रसाद पौडेल लगायत कर्मचारीहरूले स्वागत गरेका छन् । स्वागतका क्रममा उनीहरूले खादा तथा पुष्पगुच्छा प्रदान गर्दै सफल कार्यकालको शुभकामना व्यक्त गरेका थिए ।
नगरपालिकाका सूचना अधिकारी एवं वरिष्ठ प्रशासकीय अधिकृत केशवराज भट्टराईका अनुसार नवनियुक्त प्रमुख प्रशासकीय अधिकृत पाण्डेले कार्यालयमा उपस्थित भई जिम्मेवारी सम्हालेका हुन् । यसअघि प्रमुख प्रशासकीय अधिकृतको जिम्मेवारीमा रहेका भक्तिराम मरासिनीको केही दिनअघि सरुवा भएपछि उक्त पद रिक्त रहेको थियो ।
स्वागत कार्यक्रममा नगरप्रमुख अर्यालले नगरपालिकाको समग्र विकास, सुशासन र प्रभावकारी सेवा प्रवाहका लागि प्रशासनिक नेतृत्वको भूमिका महत्वपूर्ण हुने बताए । उनले नगरपालिकाका योजना तथा कार्यक्रमलाई प्रभावकारी रूपमा कार्यान्वयन गर्न प्रशासनिक संयन्त्रको सक्रियता आवश्यक रहेको धारणा व्यक्त गरे ।
त्यस्तै, उपप्रमुख रिता कुमारी चौधरीले नगरपालिकाको विकास, सुशासन र नागरिकमैत्री सेवा प्रवाहलाई प्राथमिकतामा राखेर अघि बढ्नुपर्ने बताइन् । उनले नगरपालिकाका कामलाई प्रभावकारी बनाउन जनप्रतिनिधि, कर्मचारी तथा सरोकारवाला पक्षबीच समन्वय र सहकार्य आवश्यक रहेकोमा जोड दिइन् ।
नवनियुक्त प्रमुख प्रशासकीय अधिकृत पाण्डेले नगरपालिकाको प्रशासनिक जिम्मेवारी प्रभावकारी रूपमा निर्वाह गर्दै नागरिकलाई सहज, सरल र प्रभावकारी सेवा प्रदान गर्न प्राथमिकता दिने प्रतिबद्धता व्यक्त गरे ।
प्रमुख प्रशासकीय अधिकृतको आगमनसँगै नगरपालिकाका नियमित प्रशासनिक कामकाज थप व्यवस्थित हुने, सेवा प्रवाहमा सहजीकरण हुने तथा विकास निर्माणका योजनाको कार्यान्वयनले गति लिने अपेक्षा गरिएको छ । अब प्रशासनिक नेतृत्वले नगरपालिकाको सेवा प्रवाहलाई कत्तिको प्रभावकारी बनाउँछ भन्ने विषय नागरिकको चासोको विषय बनेको छ ।