फाल्गुन २०,
प्रकाश गौतम
रुपन्देहीको तिलोत्तमा नगरपालिकाले निर्माण गरेको अत्याधुनिक सुविधासम्पन्न प्रशासनिक भवनको उद्घाटन भएको छ । तिलोत्तमा नगरपालिकाले निर्माण गरेको अत्याधुनिक सुविधासम्पन्न प्रशासनिक भवनको उद्घाटन गर्दै अर्थमन्त्री विष्णु प्रसाद पौडेलले रुपन्देहीको तिलोत्तमालाई केन्द्रमा राखेर महानगर निर्माण गरिने बताउनुभएको छ । उहाँले जिल्लाका बुटवल उपमहानगरपालिकासहित सिद्धार्थनगर नगरपालिका, देवदह लगायतका क्षेत्रलाई समेटेर प्रशासनिक कार्यालय तिलोत्तमा रहने गरी महानगर निर्माण गरिने बताए । हाल निर्माण भएको भवनमा कार्यालय सञ्चालनका लागि ठाउँ अभाव भएमा अर्को नयाँ भवन निर्माण गरेर भएपनि महानगरको केन्द्र तिलोत्तमालाई बनाउने प्रतिवद्धता व्यक्त गरेका हुन् ।
रुपन्देहीले भौतिक पूर्वाधर तथा विकास निर्माणको क्षेत्रमा फड्को मारेको बताउँदै विकास हेर्नका लागि अब रुपन्देही आउनुपर्ने वातावरण निर्माण गरिने जनाए । रुपन्देही विकासको रोल मोडल भएको दाबी गर्दै उनले जिल्लालाई विकासका हरेक क्षेत्रमा कुनै पनि हिसाबले पछि पर्न नदिने प्रतिवद्धता व्यक्त गरे ।
नगर प्रमुख बासुदेव घिमिरेको अध्यक्षतामा भएको भवन समुद्घाटन समारोहमा प्रतिनिधि सभा सदस्य छविलाल विश्वकर्माले तीन तहका सरकार विकास र समृद्घिको अभियानमा क्रियाशील रहेको उल्लेख गर्दै स्थानीय सरकारको भूमिका महत्वपूर्ण रहेको बताउनुभयो । त्यसमा पनि तिलोत्तमाले अग्रणि भूमिका निर्वहन गरेको भन्दै प्रसंशा व्यक्त गर्नुभयो ।
लुम्बिनी प्रदेशका वन, उद्योग, पर्यटन तथा वातावरण मन्त्री लिला गिरीले नगरपालिकाले गरेको कामप्रति धन्यवाद दिँदै योजनावद्घ निर्माणमा केन्द्रित हुनुपर्नेमा जोड दिनुभयो ।
कार्यक्रममा प्रदेश सभासद रमा अर्याल, भोजप्रसाद श्रेष्ठ, नगरउपप्रमुख जागेश्वरीदेवी चौधरी, बुटवल उपमहानगरकी उपप्रमुख गुमादेवी आचार्य, सोह्र छत्तीस संयुत्त सिंचाई प्रणालीका सभापति यज्ञ गैरे, तिलोत्तमा उद्योग बाणिज्य संघका अध्यक्ष गुणनिधी भण्डारी लगायतले ईञ्जिनियर प्रदीप वन , प्रमुख प्रशासकीय अधिकृत प्रदीप पौडेल लगायतले बोल्नुभएको थियो । आठ बिगाहा १४ कट्ठा क्षेत्रफलमा फैलिएको प्रशासनिक भवन परिसरमा १९१२.६ वर्गमिटरमा फैलिएको चार तलाको भवन निर्माण भएको छ । भवनमा करिव १२० जना क्षमताको सभाहलसहित ४० कोठा रहेका छन् । अपाङ्तामैत्री, लिफ्ट सुविधासहितको भवनमा आकर्षक गार्डेनिङको काम अघि बढेको छ । ८ करोड ७९ लाख लागत अनुमान रहेको भवनको निर्माण सम्झौता ६ करोड ४२ लाखमा भएको थियो ।
समारोहमा जग्गा संरक्षण गर्ने स्थानीय तथा नगर भवन अगाडि रहेको बुद्धमूर्ति निर्माण गर्ने मूर्तिकार गोविन्द चौधरीलाई पनि सम्मान गरिएको थियो । त्यसअवसरमा अर्थमन्त्री पौडेलले नगरपालिकाले सञ्चालनमा ल्याएको डिजिटल नागरिक वडापत्रको सुभारम्भ गर्नुभएको थियो भने नगरपालिकाले प्रदान गरेको सम्मान–पत्र कुञ्ज टोल विकास संस्थालाईप्रदान गर्नुभएको थियो ।
कार्यक्रमको सन्चालन तिलोत्तमा नगरपालीका प्रबत्ता प्रवक्ता सुरेन्द्र श्री ले गर्नु भएको थियो ।
