परासी, १७ बैशाख
कोरोना संक्रमणको जोखिम बढेपछि पश्चिम नवलपरासीका ३ स्थानीय तह बन्द गरिएको छ । ति सबै स्थानीय तहहरुले अत्यावश्यक सेवाबाहेकका सबै सेवा बन्द गरिएको जनाएका हुन् । १ जना जनप्रतिनिधि र २ जना कर्मचारीमा संक्रमण देखिएपछि बैशाख २५ गतेसम्मका लागि रामग्राम नगरपालिका बन्द गरिएको प्रमुख प्रशासकीय अधिकृत राजेश पन्थीले बताउनुभयो । त्यसैगरी २ जना कर्मचारीमा संक्रमण देखिएपछि २१ गतेसम्मका लागि सुनवल नगरपालिका बन्द गरिएको नगरपालिकाका प्रमुख भीम बहादुर थापाले बताउनुभयो । त्यस्तै १ जना कर्मचारीमा संक्रमण देखिएपछि २२ गतेसम्मका लागि सरावल गाउँपालिका बन्द गरिएको अध्यक्ष राधेश्याम चौधरीले बताउनुभयो । कोरोनाको दोस्रो लहर सुरु भएपछि जिल्लामा ८ जनाको मृत्य भएको छ । संक्रिय संक्रमितको संख्या २ सय ८६ पुगेको छ । मृत्यु हुनेमा सबैभन्दा बढी रामग्राम नगरपालिकामा मात्र ५ जना रहेको स्वास्थ्य कार्यालयका प्रमुख कृष्ण प्रसाद पोखरेलले बताउनुभयो । हालसम्म जिल्लामा संक्रमणबाट मृत्यु हुनेको संख्या ४१ पुगेको छ ।