फिफा वरीयतामा नेपाल १७१औं स्थानमा यथावत

[sharethis-inline-buttons]

१३ जेठ, काठमाडौं ।
फिफा वरीयतामा नेपाल १७१औं स्थानमा यथावत रहेको छ । विश्व फुटबलको सर्वोच्च निकाय फिफाले बिहीबार सार्वजनिक गरेको पछिल्लो वरीयतामा नेपाल यथावत रहेको हो । अप्रिल ७ मा पनि नेपाल १७१ औं स्थानमै थियो । पछिल्लो वरीयतामा जम्मा एक स्थानमा मात्र परिवर्तन भएको छ । युक्रेनसँग गोलरहित बराबरी खेलेको बहराइन एक स्थान सुधार गर्दै ९८ औं स्थानमा उक्लँदा किर्गिस्तान ९९औं स्थानमा झरेको छ । फिफा विश्वकप र एएफसी एसियन कपको संयुक्त छनोटको तयारीमा रहेको नेपाली राष्ट्रिय टोली हाल मैत्रीपूर्ण खेलका लागि इराकमा छ । नेपालले शनिबार पूर्व एसियन च्याम्पियन तथा ६८औं वरीयतामा रहेको इराकसँग मैत्रीपूर्ण खेल खेल्दैछ । दक्षिण एसियाली राष्ट्रमा वरीयतामा नेपालभन्दा अघि भारत र माल्दिभ्स रहेका छन् । भारत १०५ औं र माल्दिभ्स १५५ औं स्थानमा रहेको छ । यस्तै नेपालभन्दा पछि बंगलादेश १८४ औं, भुटान १८७ औं, पाकिस्तान १९९ औं र श्रीलंका २०४ औं स्थानमा छन् । विश्व वरीयताको शीर्ष दशमा कुनै परिवर्तन भएको छैन ।

 


प्रकाशित : २०७८ जेष्ठ १३, बिहीबार ११:४३