लिओनल मेसी, किलियन एमबाप्पे र एर्लिङ हालान्डले फिफा विश्वकप २०२६ को सुरुआती खेलमा उत्कृष्ट प्रदर्शन गरेका छन्। अब सबैको ध्यान क्रिस्टियानो रोनाल्डोतर्फ केन्द्रित भएको छ।
पोर्चुगलका ४१ वर्षीय रोनाल्डो बुधबार विश्वकप अभियानको पहिलो खेलमा कंगोविरुद्ध मैदान उत्रने तयारीमा छन्। प्रतियोगिताका अन्य स्टार खेलाडीहरूले प्रभावशाली सुरुआत गरिसकेका बेला रोनाल्डोमाथि पनि ठूलो अपेक्षा छ।
मंगलबार फ्रान्सका एमबाप्पे र नर्वेका हालान्डले समान दुई–दुई गोल गर्दै आफ्नो टोलीलाई जित दिलाए। त्यसपछि अर्जेन्टिनाका कप्तान मेसीले ह्याट्रिक गर्दै विश्वकप इतिहासमा नयाँ कीर्तिमान बनाए।
मेसीको कुल विश्वकप गोल संख्या १६ पुगेको छ। योसँगै उनी जर्मनीका मिरोस्लाभ क्लोजेसँग संयुक्त रूपमा सर्वाधिक गोलकर्ता बनेका छन्।
रोनाल्डो पनि इतिहास रच्ने अभियानमा छन्। यदि यस विश्वकपमा गोल गर्न सफल भए भने उनी लगातार ६ फरक विश्वकपमा गोल गर्ने विश्वकै पहिलो खेलाडी बन्नेछन्। मेसी पनि आफ्नो छैटौं विश्वकप खेलिरहेका छन्। तर, उनले सन् २०१० को विश्वकपमा गोल गर्न सकेका थिएनन्।
कंगोका मुख्य प्रशिक्षक सेबास्टियन डेसाब्रेले रोनाल्डोबारे प्रतिक्रिया दिँदै भने,‘म उनलाई शुभकामना दिन्छु। उनले गोल गरून् भन्ने चाहन्छु, तर हाम्रो टोलीविरुद्ध होइन।’
रोनाल्डो भने व्यक्तिगत कीर्तिमानभन्दा टोलीको सफलतामा केन्द्रित देखिएका छन्। पोर्चुगलबाट प्रस्थान गर्नुअघि उनले पत्रकारहरूसँग भनेका थिए,‘हामी खेल–खेलमा ध्यान दिइरहेका छौं। अहिले नै उपाधि जित्ने कुरा सोचिरहेका छैनौं। सबै कुरा चरणबद्ध रूपमा अगाडि बढ्नुपर्छ। राम्रो सुरुआत सबैभन्दा महत्त्वपूर्ण हो।’
यद्यपि, केही पोर्चुगाली समर्थकहरू भने रोनाल्डोको उमेरलाई लिएर चिन्तित छन्। कतारमा सम्पन्न २०२२ विश्वकपमा रोनाल्डोले एक गोल गरेका थिए।
दक्षिण कोरियाविरुद्धको खेलमा प्रतिस्थापन गरिएपछि उनी असन्तुष्ट देखिएका थिए भने स्विट्जरल्यान्डविरुद्धको नकआउट खेलमा बेन्चमा राखिएका थिए।
त्यसपछि २०२४ युरोपियन च्याम्पियनसिपमा पनि उनले कुनै गोल गर्न सकेनन्। योसँगै अन्तर्राष्ट्रिय करिअरमा पहिलो पटक उनी ठूलो प्रतियोगितामा गोलविहीन भएका थिए।
तर, पछिल्ला वर्षहरूमा उनले पुनः आफ्नो गोल गर्ने क्षमता प्रमाणित गरेका छन्। २०२५ यूईएफए नेसन्स लिगमा पोर्चुगललाई उपाधि दिलाउने क्रममा उनले ८ गोल गरेका थिए। यसमा स्पेनविरुद्धको फाइनलमा गरेको महत्त्वपूर्ण बराबरी गोल पनि समावेश छ।
त्यस्तै, उनले हालै साउदी प्रो–लिगमा अल-नासरलाई पहिलो पटक लिग उपाधि जिताउन महत्वपूर्ण भूमिका खेले। उनले सिजनभर २८ गोल गर्दै क्लबका सर्वाधिक गोलकर्ता बने।
अब विश्व फुटबलका समर्थकहरू प्रतीक्षामा छन्। के रोनाल्डोले विश्वकपमा अर्को ऐतिहासिक अध्याय थप्दै आफ्नो नाम अझ सुनौलो अक्षरमा लेख्लान् त?
