हरि आचार्य, कपिलवस्तु
बनगाई फुटबल कप २०७८ को उपाधी मुहान फुटबल क्लवले हात पारेको छ । बनगाई फुटबल क्लवले आयोजना गरेको बाणगंगामै अहिलेसम्मकै सर्वाधिक टिमको प्रतिस्पर्धा रहेको उक्त फुटबल प्रतियोगितामा श्रृजनशील युवा क्लव मोतिपुर डांडालाई पराजित गर्दै मुहानले उपाधि हात पारेको खेल संयोजक तथा क्लवका प्रस्तावित अध्यक्ष तिलक गिरीले जानकारी दिएका छन् । नगरमै सर्वाधिक ४२ टिमको प्रतिस्पर्धा रहेको खेल बाणगंगा नगरपालिका वडा नं. ७ का वडाध्यक्ष बिष्णु गिरीले उद्घाटन गरेका थिए भने संविधान सभा सदस्य बलराम अधिकारीले खेलको समापन गरेका थिए । ३–० ले पछाडि पार्दै मुहान विजेता बन्न सफल भएको हो भने श्रृजनशील युवा क्लव उपविजेता बनेको छ ।
दिपक थापाको कप्तानीमा रहेको विजेता टोलि मुहानका खेलाडी मिलन थापा २ गोल गर्दै म्यान अफ द म्याच घोषित हुन सफल भएका छन् भने सोहि टिमका खेलाडी अजय सेनले १ गोल गरेका थिए ।
जितसंगै मुहान क्लवले नगद रु. २० हजार, शिल्ड मेडल तथा उपविजेता श्रृजनशिलले नगद रु. १० हजार शिल्ड मेडल प्राप्त गरेको छ ।
समापन कार्यक्रमका प्रमुख अतिथि संविधान सभा सदस्य बलराम अधिकारीले खेल र खेलाडीहरुले राष्ट्रको नाम उचो बनाउने हुंदा यी खेल प्रतियोगिताले ठुलो भुमिका खेल्ने बताए । स्थानीय तह आएसंगै खेलकुद क्षेत्रको विस्तारै विकास हुंदै गएको बताउदै विजेता र उपविजेता टिमलाई बधाई ज्ञापन गरे ।
त्यस्तै वडा नं. ७ का वडाध्यक्ष बिष्णु गिरीले बधाई ज्ञापन गर्दै यो प्रतियोगिता अत्यन्तै अनुशासित र मर्यादित रुपमा सम्पन्न भएको बताए । कार्यक्रमका विशिष्ठ अतिथि समेत रहेका वडाध्यक्ष गिरीले आगामि आर्थिक बर्ष यस्तै प्रतियोगिताका लागि रु १ लाख बजेट विनियोजन गर्ने घोषणा समेत गरे ।
धैरेनी डांडा टोल विकास संस्थाका अध्यक्ष भिम थापाले पनि शुभकामना मन्तब्य राख्दै खेल निकै रोमाञ्चक, अनुशासित र प्रतिस्पर्धात्मक भएको बताए ।
करिव २० दिन चलेको खेल निकै रोमाञ्चक, अनुशासित र प्रतिस्पर्धात्मक भएको खेल संयोजक तथा क्लवका प्रस्तावित अध्यक्ष तिलक गिरीले लुम्बिनी दर्पणलाई बताएका छन् । उनले खेल सफल पार्नका लागि सहयोग गर्ने सम्पुर्ण सहयोगी दातालाई धन्यवाद समेत प्रकट गरेका छन् ।
तिलक काउचाको अध्यक्षता, खेल निर्देशक प्रवेश खनालको सञ्चालन रहेको कार्यक्रममा वडा सदस्य मुम बहादुर पाण्डे, जिल्ला खेलकुद विकास समिति सदस्य सुशिल खत्री लगायतको आतिथ्यता रहेको थियो ।
