हरि आचार्य, कपिलवस्तु
स्वतन्त्र विद्यार्थी युनियन (स्ववियु) सिद्धार्थ क्याम्पसद्धारा आयोजित खेलकुद सप्ताह निकै प्रतिस्पर्धात्मक बनेको छ । खेल अन्तर्गत तेस्रो दिनमा तीन खेल सम्पन्न भएका छन् । आज भएको छात्राहरुको १ सय मिटर दौड प्रतियोगितामा निलम अधिकारी प्रथम, विन्दु अधिकारी दोस्रो र मिना गैरे तेस्रो हुन सफल भएका छन् ।

त्यस्तै छात्रतर्फको २ सय मिटर दौडमा निराजन बुढाथोकी प्रथम, सन्तोष खनाल दोस्रो र कृष्ण बानिया तेस्रो भएका छन् । क्रिकेट तर्फ विविएस प्रथम बर्ष नयाँ र विविएस प्रथम बर्ष पुरानो बिच भएको सेमिफाईनल खेलमा विविएस प्रथम बर्ष नयाँले ४ रनको रोमान्चक जित हासिल गरेको छ ।

आजै भएको छात्राहरुको भलिबलमा कक्षा ११ को ए टिम प्रथम भएको खेल सप्ताहका खेल सहसंयोजक अङकित पोखरेलले जानकारी दिनुभएको छ । भोलि पनि ३ खेल हुने छन् । कबड्डीसंगै फुटबल र क्रिकेटको फाईनल खेल हुने खेल संयोजक पुस्कर भुसालले जानकारी दिए ।