हरि आचार्य, कपिलवस्तु
राष्ट्रिय जनसांस्कृतिक महासंघ नेपाल जिल्ला कमिटि कपिलवस्तुको अध्यक्षमा महेश घिमिरे निर्वाचित हुनुभएको छ । नेपाल कम्युनिष्ट पार्टी (एमाले) को जनवर्गीय संगठन राष्ट्रिय जनसांस्कृतिक महासंघ नेपाल जिल्ला कमिटिको नवौँ अधिवेशनबाट घिमिरेको अध्यक्षतामा २१ सदस्यीय जिल्ला कमिटि सर्वसम्मत रुपमा निर्वाचित भएको हो । जसको उपाध्यक्षमा लक्ष्मी खनाल र शारदा खनाल, सचिवमा शिव खनाल, सह– सचिवमा लिला परियार र सागर पौडेल, कोषाध्यक्षमा सुमन पौडेल, सहकोषाध्यक्षमा बर्षा लम्साल सर्वसम्मत रुपमा निर्वाचित हुनुभएको छ भने अन्य सदस्यमा चयन हुनुभएको छ ।
अध्यक्षमा सर्वसम्मत निर्वाचित भएसंगै घिमिरेले अध्यक्ष पदमा सर्वसम्मत रुपमा चयन गर्न सहयोग गर्नुहुने सम्पुर्णलाई आभार व्यक्त गर्दै विशुद्ध नेकपा एमालेमा आवद्ध सम्पुर्ण संगीतप्रेमीहरुका हक हित तथा अधिकारका लागि लड्ने बताउनुभयो । उहाँले पार्टीले अंगालेका योजनाहरुलाई अंगाल्दै पार्टीलाई मजबुत र बलियो बनाउनमा आफ्नो अहम भुमिका रहने बताउनुभयो । अध्यक्ष घिमिरेले आसन्न स्थानीय तहको निर्वाचनमा देशैभर एमालेलाई जिताउनका लागि संगठनले पार्टी जिल्ला कमिटिसंग समन्वय गरेर अगाडि बढ्ने प्रतिवद्धता व्यक्त गर्नुभयो ।
कार्यक्रमका प्रमुख अतिथि नेपा (एमाले) लुम्बिनी प्रदेश सचिवालय सदस्य झविलाल पोख्रेलले पार्टीलाई मजबुत र बलियो बनाउन राष्ट्रिय जनसांस्कृतिक महासंघको अहम भुमिका रहेको ईतिहास देखिनै छर्लङ्ग भएको बताउनुभयो । निवर्तमान जिल्ला अध्यक्ष समेत रहनुभएका पोख्रेलले पार्टीको निति, कार्यक्रम संगीतको माध्यमबाट जनतालाई सुशुचित गराउने माध्यम जनसांस्कृतिक महासंघ नै भएकाले सम्पुर्ण एक भएर लाग्न आवश्यक रहेको बताउनुभयो ।
विशिष्ठ अतिथि नेकपा (एमाले) कपिलवस्तुका सचिव सि.बि.गहतराजले पार्टीको जनवर्गीय संगठन राष्ट्रिय जनसांस्कृतिक महासंघले समाजमा एमाले प्रतिको आकर्षलाई प्रतिबिम्ब गरेको बताउनुभयो । उहाँले आसन्न स्थानीय तहको निर्वाचनमा एमालेलाई देशको सबै भन्दा ठुलो पार्टी बनाउनका लागि यस संगठनले अहम भुमिका खेल्ने विश्वास व्यक्त गर्दै नयाँ कार्यसमितिलाई बधाई ज्ञापन गर्नुभयो ।
त्यस्तै महासंघका जिल्ला ईन्चार्ज पुर्ण चन्द्र परियार, केन्द्रिय सदस्य थानेश्वर अधिकारीले नयाँ कार्य समतिलाई बधाई ज्ञापन गर्दै शुभकामना मन्तब्य राख्नुभएको थियो ।
महासंघका निवर्तमान अध्यक्ष धनु गाहाको अध्यक्षता, शारदा खनालको स्वागत तथा शिव खनालको सञ्चालनमा सम्पन्न कार्यक्रममा एमाले सचिवालय सदस्य तथा पार्टी युवा नेता विश्व कार्की, राधेश्याम न्यौपानेको आतिथ्यता रहेको थियो भने महासंघमा आवद्ध संगीतप्रेमीहरुको उपस्थिती रहेको थियो ।
