बुटवलमा निर्माण गरिएको प्रदेश जनस्वास्थ्य प्रयोगशाला प्रदेश सरकारलाई हस्तान्त्रण

[sharethis-inline-buttons]

लुदअ,बुटवल । बुटवलमा निर्माण गरिएको प्रदेश जनस्वास्थ्य प्रयोगशाला भवन लुम्बिनी प्रदेश सरकारलाई हस्तान्तरण गरेको छ। ८ करोड ७० लाख २० हजारको लागतमा निर्माण गरिएको भवन सोमबार हस्तान्तरण गरिएको हो।

अत्याधुनिक सुविधा सम्पन्न प्रयोगशालाबाट कोभिड–१९ र क्षयरोग लगायत अन्य विविध खालका सरुवा रोगहरुको उच्चस्तरीय माइक्रोबायोलोजिकल र इम्युनोलोजिकल परीक्षणदेखि प्याथोलोजिकल र विशिष्टकृत मलिक्युलर विश्लेषण लगायतका सेवा प्रदान गरिने छ।

एड्स, क्षयरोग र मलेरियाविरुद्ध ग्लोबल फण्डको अनुदानमा निर्माण गरिएको भवन सेभ द चिल्ड्रेनले लुम्बिनी प्रदेश सरकारलाई हस्तान्तरण गरेको हो।

प्रदेश जनस्वास्थ्य प्रयोगशाला ग्लोबल फण्डका वरिष्ठ पोर्टफोलियो व्यवस्थापक स्टेफन स्टोजानोभिक र सेद द चिल्ड्रेन नेपाल र भुटान कन्ट्री अफिसकी राष्ट्रिय निर्देशक हेदर क्याम्पबेलले संयुक्तरुपमा लुम्बिनी प्रदेशका मुख्यमन्त्री डिल्लीबहादुर चौधरीलाई हस्तान्तरण गरे।

लुम्बिनी प्रदेशका मुख्यमन्त्री चौधरीले यस प्रयोगशालामा उपलब्ध हुने सेवाहरूको गुणस्तर तथा विश्वसनीयता कायम गर्नु मात्र नभई लुम्बिनी प्रदेश र अन्य प्रदेशमा समेतको स्वास्थ्य सेवासम्बन्धी आवश्यकताहरू परिपूर्ति गर्नेतर्फ अघि बढ्नु सबैको दायित्व भएको बताए।

प्रदेश जनस्वास्थ्य प्रयोगशालाले स्वास्थ्य सेवा पूर्वाधारको सुदृढीकरण गर्ने र स्वास्थ्य समस्याको समयमै सही परीक्षण र उपचार सुनिश्चित गर्ने लक्ष्य राखेको छ। यस्तै यस प्रयोगशालाले लुम्बिनी प्रदेशमा सञ्चालनमा रहेका अन्य स्वास्थ्य प्रयोगशालाहरूको नियमन गर्न प्रदेश र स्थानीय सरकारहरूलाई सक्रिय रूपमा सहयोग गर्नेछ।

क्षमता सुदृढीकरण कार्यक्रममार्फत यस प्रयोगशालाले लुम्बिनी प्रदेशका प्रयोगशालाहरूमा कार्यरत जनशक्तिको क्षमता अभिवृद्धि गर्ने, प्रयोगशालाहरूलार्ई प्राविधिक सहायता प्रदान गर्ने, प्रयोगशालाहरूको उच्च गुणस्तर कायम राख्ने र सर्वसाधारणलाई न्यून मूल्यमा प्रयोगशालासम्बन्धी सेवा दिनका लागि समेत सहयोग गर्नेछ।


प्रकाशित : २०८० श्रावण १६, मंगलवार १०:१८