चन्दौटा। समुदायस्तरमा सरसफाइ तथा स्वच्छतासम्बन्धी सकारात्मक व्यवहार परिवर्तनलाई प्रभावकारी बनाउन कपिलवस्तुको विजयनगरमा सरसफाइ उत्प्रेरकहरूका लागि तीनदिने सरसफाइ तथा स्वच्छता तालिम सुरु भएको छ।
सेचेन करुणाको आयोजना तथा विजयनगर गाउँपालिकाको समन्वयमा विजयनगर र यशोधरा गाउँपालिकाका २० जना सरसफाइ उत्प्रेरक सहभागी तालिम साउन २९ देखि ३१ गतेसम्म विजयनगर गाउँपालिका–स्थित गुगौली स्वास्थ्य चौकीको सभाहलमा सञ्चालन भएको छ।
सरसफाइ उत्प्रेरकहरूको ज्ञान, सीप तथा क्षमता अभिवृद्धि गरी उनीहरूलाई समुदायमा सरसफाइ, स्वच्छता तथा स्वास्थ्यसम्बन्धी व्यवहार परिवर्तनका लागि प्रभावकारी रूपमा परिचालन गर्ने उद्देश्यले तालिम आयोजना गरिएको हो।
तालिममा सहभागीहरूलाई नेपालको राष्ट्रिय तथा जिल्लास्तरीय स्वास्थ्य तथा सरसफाइको अवस्था, राष्ट्रिय नीति तथा निर्देशिका, समुदायको अगुवाइमा स्वच्छता तथा सरसफाइ प्रवर्द्धनसम्बन्धी अवधारणा, सरसफाइ उत्प्रेरकको भूमिका तथा कार्यक्षेत्रलगायतका विषयमा प्रशिक्षण दिइएको छ।
त्यस्तै, व्यवहार परिवर्तन तथा सञ्चार, सुरक्षित पानीको उपयोग, स्वच्छता तथा सरसफाइका पाँच मुख्य आयाम, जागरण तथा उत्प्रेरणा र समुदायमा सकारात्मक परिवर्तनका लागि प्रभावकारी सञ्चारलगायतका विषयलाई तालिममा प्राथमिकता दिइएको छ।
तालिमका क्रममा सहभागीहरूलाई समुदायमा बैठक तथा अभिमुखीकरण सञ्चालन गर्ने तरिका, व्यवहार परिवर्तनका लागि प्रभावकारी सञ्चार, खुला दिसामुक्त तथा स्वच्छता अभियानका अभ्यास, उत्प्रेरणाका विभिन्न विधि तथा सिकाइ र प्रतिवेदन प्रस्तुतिलगायतका विषयमा प्रयोगात्मक अभ्याससमेत गराइएको छ।
यसैगरी, सूचना, शिक्षा तथा सञ्चार सामग्रीको प्रयोग, जागरण तथा उत्प्रेरणाका लागि स्थानीय सामग्रीको प्रयोग, खानेपानी , सरसफाइ तथा स्वच्छता योजना, अन्तरसम्बन्धित सवाल तथा कार्यक्रमसँग सम्बन्धित व्यवहारिक विषयमा समेत प्रशिक्षण दिइने आयोजकले जनाएको छ।
तालिममा व्यवहारिक अभ्यास, समूहगत छलफल, सिमुलेसन एक्सरसाइज तथा प्रस्तुतीकरणमार्फत सहभागीहरूको सिकाइलाई प्रभावकारी बनाउने पद्धति अपनाइएको थियो। तालिमको सहजीकरण सरसफाइ प्रशिक्षक थानेश्वर अधिकारी र परियोजनाको कार्यक्रम अधिकृत प्रमिला अर्याल र सहजकर्ता हरि शंकर उपाध्यायले गरेका छन्।
तीन दिने तालिमले सरसफाइ उत्प्रेरकहरूको क्षमता अभिवृद्धि गर्दै समुदायमा सरसफाइ तथा स्वच्छतासम्बन्धी सचेतना र सकारात्मक व्यवहार परिवर्तनको अभियानलाई थप प्रभावकारी बनाउन महत्वपूर्ण योगदान पुग्ने अपेक्षा गरिएको छ।
