लुदस,सैनामैना । रुपन्देहीको सैनामैनामा २०६२ सालमा स्थापना भएको दुधराक्ष युवा क्लवले सामाजिक र खेल क्षेत्रको विकासमा निकै सकृयता र अग्रसरता देखाएको छ । क्लवले युवा खेलाडीलाई प्रोत्साहित गर्न खेलकुद प्रतियोगिता आयोजनामात्रै गरेको छैन, सैनामैनाको पर्यावरण क्षेत्रमा समेत काम गरेर अब्बल सावित गरेर क्लवलाई नमूना बनाउने प्रयास गरिरहेको छ ।
सोमबार सैनामैनाको कलौनीस्थित सैनामैना वाटर पार्कमा आयोजित पत्रकार सम्मेलनमा क्लबले भलिबल खेलको विकाससंगै युवा खेलाडीलाई प्रोत्साहित गर्ने उद्देश्यले ढुण्डी थरुनी स्मृति कप अन्तर जिल्लास्तरीय भलिवल प्रतियोगिता गर्ने जनाएको छ । कार्यक्रममा क्लबका अध्यक्ष किरण पोखरेलले नेपालको राष्ट्रिय खेललाई प्रचारप्रसार र खेलाडीलाई प्लेटफर्म दिने उद्देश्यका साथ प्रतियोगिता गर्न लागेको बताए । उनले सैनामैना समेत खेल क्षेत्रमा अगाडी बढ्न सक्छ भन्ने यो प्रतियोगिताको आयोजनाबाट प्रमाणित हुने बताए । सैनामैनामा हुने भलिवल प्रतियोगिता कोभिडपछिको जिल्लाकै पहिलो ठूलो प्रतियोगिता भएको पोखरेलको भनाई छ । पोखरेलले प्रतियोागितामा राष्ट्रियस्तरका खेलाडीलाई समेत उपस्थित गराएर सैनामैनालाई खेलकुदमय बनाउने बताए ।
प्रतियोगिताका खेल संयोजक विष्णुप्रसाद पाण्डेले सैनामैना नगर क्षेत्रमा हुने भलिवल खेल प्रतियोगिताका माध्यमबाट समग्र सैनामैनाको खेलका साथै आर्थिक, पर्यटन तथा सांस्कृतिक बिकासमा सहयोग पुग्ने बताए । उनले लुम्बिनी प्रदेशका १२ वटै जिल्लालाई समेटेर प्रतियोगिता आयोजना गर्न लागिएको बताउँदै प्रतियोगिता भब्यरुपमा सफल बनाउन सवैको सहयोगको अपेक्षा गरेको बताउनु बताए ।
मंसिर १२ देखि १६ गतेसम्म सैनामैनाको कलौनीमा हुने प्रतियोगिताको उपाधि विजेताले नगद १ लाख ११ हजार १ सय ११ ट्रफी, प्रमाणपत्र, उपविजेताले नगद ७७ हजार ७ सय ७७ रुपैया, ट्रफी, प्रमाणपत्र, तृतिय टिमले नगद ४४ हजार ४ सय ४४ रुपैया, ट्रफी, प्रमाणपत्रबाट पुरस्कृत गरिने खेल संयोजक पाण्डेले बताए ।
यसैगरि सान्त्वना टिमले नगद २२ हजार २ सय २२ रुपैया, ट्रफी प्रमाणपत्र, विधागत उत्कृष्ट खेलाडीहरुलाई नगद ७ हजार ७ सय ७७ रुपैया तथा सर्वोत्कृष्ट खेलाडीलाई १५ हजार ५ सय ५५ रुपैयाबाट पुरस्कृत गरिने छ ।
कार्यक्रममा जिल्ला भलिबल संघ रुपन्देहीका अध्यक्ष सुरेन्द्र शाक्यले खेल विकासमा सरकारको लगानी न्यून रहेको बताउँदै त्यसका कारण खेल क्षेत्रको विकासमा धेरै सफलता प्राप्त नभएको बताउनु भयो ।
सैनामैना नगरपालिका वडा नं ७ का वडाअध्यक्ष तथा खेलप्रेमी राजकुमार चौधरीले आफनो हजुरआमा ढुण्डी थरुनीको स्मृतिमा आयोजना हुने उक्त प्रतियोगितामा दुई लाख रुपैया सहयोग गरेका छन् ।
लुम्बिनी प्रदेश र अन्य जिल्ला गरि १२ टिमहरुले भाग लिने प्रतियोगिता संचालन गर्न १६ लाख रुपैया खर्च हुने आयोजक क्लबका सचिव पदम पाण्डेले बताए ।
