रुपन्देही, तिलोत्तमा।
तिलोत्तमा नगरपालिका–१०, सेमराबजारस्थित सेमराबजार स्वास्थ्य चौकीलाई संघीय सरकारबाट बिनियोजित ३ करोड रुपैयाँ कार्यान्वयन गर्ने विषयमा सहजीकरण कार्यक्रम सम्पन्न भएको छ।
तिलोत्तमा १० का अध्यक्ष गोपाल घिमिरेको अध्यक्षता भएको कार्यक्रममा रुपन्देही क्षेत्र नं। १ का सांसद छविलाल विश्वकर्मा, तिलोत्तमा नगर प्रमुख रामकृष्ण खाण, उपप्रमुख जागेश्वरी चौधरी, प्रमुख प्रशासकीय अधिकृत, विभिन्न वडाका अध्यक्षहरू, कार्यपालिका सदस्यहरू, वडा सदस्यहरू साथै वडामा क्रियाशील विभिन्न संघ–संस्थाका प्रतिनिधिहरूको उपस्थितिमा कार्यक्रम सम्पन्न भएको हो ।
कार्यक्रमलाई सम्बोधन गर्दै रुपन्देही क्षेत्र नं। १ का सांसद छविलाल विश्वकर्माले सेमराबजार स्वास्थ्य चौकीलाई आजको अवस्थामा ल्याउन धेरै प्रयास गरिएको स्मरण गराउनु भएको छ । उनले “यो स्वास्थ्य चौकीका लागि लालपुर्जा ल्याउनेदेखि बजेट सुनिश्चित गर्नसम्म पटक–पटक पहल गरेको र अहिले ३ करोड रुपैयाँ विनियोजन भएको भन्दै आगामी दिनमा समेत निरन्तर पहल गर्ने बताउनु भयो । साथै उनले जनताको आवश्यकतालाई प्राथमिकतामा राखेर भौतिक संरचना निर्माणमा आफू निरन्तर खटिने प्रतिबद्धता जनाए।
कार्यक्रममा तिलोत्तमा नगर प्रमुख खाणले स्वास्थ्य चौकीलाई सामान्य चौकीमा मात्र सीमित नगरी अस्पतालको रुपमा विकास गर्ने लक्ष्य रहेको बताए। “नगरबासीले सहज र गुणस्तरीय स्वास्थ्य सेवा पाउनुपर्छ, त्यसका लागि नगरपालिका गम्भीर छ,” उनले जोड दिए।
उपप्रमुख चौधरीले सेमराबजार स्वास्थ्य चौकीलाई विशेषत मातृ शिशु अस्पतालका रूपमा विस्तार गर्ने योजना रहेको बताइन्। उनले महिला र बालबालिकाको स्वास्थ्यलाई प्राथमिकतामा राख्दै आवश्यक पूर्वाधार विकास गर्ने आश्वासन दिइन्।
योजनाको कार्यान्वयन विधिबारे प्राविधिक राय प्रस्तुत गर्दै ई। राजु न्यौपानेले “योजना एक वर्षे गर्ने वा बहुवर्षीय बनाउने भन्ने विषयमा भेलाले स्पष्ट निर्णय गर्न जरुरी रहेको बताउनु भयो। त्यस्तै, सडक निर्माण र आवश्यक भौतिक व्यवस्थापनका बारेमा ई। सागर कार्कीले पनि विस्तृत प्राविधिक जानकारी प्रस्तुत गरेका थिए।
कार्यक्रममा तिलोत्तमा १० का अध्यक्ष गोपाल घिमिरेले स्वास्थ्य चौकीलाई दीगो र प्रभावकारी बनाउन सामूहिक प्रयास आवश्यक रहेको धारणा राखे। सामाजिक अगुवा कृष्णप्रसाद पौडेलको स्वागत मन्तव्यबाट सुरु भएको कार्यक्रमलाई सेमराबजार स्वास्थ्य चौकी, तिलोत्तमा–१० का इन्चार्ज कमल पाण्डेले सञ्चालन गरेका थिए।
