लुदस,जितपुर । लक्ष्मणघाट बोलबमधाम विकास समितिको आयोजनामा बिगतका बर्षहरुमा झै यस बर्ष पनि यही कार्तिक १९ देखी २१ गते सम्म लक्ष्मणघाटमा तिन दिने लक्ष्मणघाट पुर्णिमा मेला तथा विविध साँस्कृतिक हुने भएको छ ।
सय बर्ष अगाडीबाट संचालन हुदै आएको सो मेलामा कपिलवस्तु, अर्घाखाँची, प्युठान,रुपन्देही र छिमेकी मुलुक भारत बाट समेत श्रद्धालु भक्तजनहरु मेला भर्न आउने गरेको लक्ष्मणघाट बोलबमधाम विकास समितिका अध्यक्ष तथा मेला मुल आयोजक समितिका संयोजक रन बहादुर काउचाले जानकारी दिएका छन् ।
सो कार्यक्रमलाई भव्य र सभ्य रुपमा सम्पन्न गर्न रनबहादुर काउचाको संयोजकत्वमा मेला मुल आयोजक समिति गठन गरिएको छ । यसै गरी सहसंयोजकमा तेज बहादुर थापा रहेका छन् भने बिभिन्न बिषयगत समिति गठन गरेको मेलाको सहआयोजक संस्था लक्ष्मणघाट सामाजिक विकास केन्द्रका उपाध्यक्ष अंजित खनालले जानकारी दिएका छन् ।
प्रत्येक बर्ष पुर्णिमा मेलाको अवसरमा बिशेष गरी थारु समुदायका मानिसहरुले बाणगंगा नदिमा स्थान गरी गौपुजन गर्ने दान दिने कथा सुन्ने , मुण्डन गरी मनाइने यो धार्मिक पर्व अहिले सबै समुदायका मानिसले मनाउने गरेको बाणगंगा नगरपालिका वार्ड नं ६ का वडाध्यक्ष करुण टण्डनले जानकारी दिएका छन् । अहिलेको सो मेलामा बिभिन्न स्थानिय व्यापार व्यवसायलाई प्रवद्र्धन गर्न बिभिन्न व्यवसायिक, कृषि, खाद्यान्न तथा घरेलु उत्पादनका स्टलहरु राखिने भएको छ । साथै मेलामा पिङ,झुला, मिक्की माउस र बाल उद्यान समेत राखिने भएकाले दर्शकहरुको उपस्थिती बढ्ने मेलाका साँस्कृतिक संयोजक बिरेन्द्र रेग्मीले बताएका छन् ।
सो कार्यक्रममा चर्चित गायिका अञ्जु कुश्मी (फुल कुमारी), दिपिका व्याम्बु, दिपु मगर लगायत साहसी कदम नेपाल रुपन्देहीको प्रस्तुती रहने साँस्कृतिक संयोजक रेग्मीले बताएका छन् । तिन दिन सम्म सञ्चालन हुने सो मेलामा करिव २०००० दर्शकले अवलोकन गर्ने अनुमान गरिएको छ । सो मेला तथा साँस्कतिक कार्यक्रमलाई प्रभावकारी रुपमा सफल गर्न बिभिन्न संघ संस्था निकायसँग समन्वय गर्ने आयोजकले बताएको छ । मेलाको संरक्षकमा बाणगंगा नगरपालिका वडा नं ६ को कार्यालय र सह–आयोजकमा लक्ष्मणघाट सामाजिक विकास केन्द्र रहेको छ ।
मेलामा अहिले सम्म करिव ६० जना व्यापारीहरुले स्टल दर्ता गरेको लक्ष्मणघाट बोलबमधाम विकास समितिका सचिव प्रकाश भुषालले जानकारी दिएका छन् ।
