सरिता थारु, कपिलवस्तु । ख्रिष्टमसको अवसरमा बाणगङ्गा नगरपालिका–१, बैरिया स्थित बाशान बिश्वासी मण्डलीको आयोजनामा शुभकामना आदान–प्रदान कार्यक्रम भव्य रूपमा सम्पन्न भएको छ ।
कार्यक्रममा प्रमुख अतिथिका रूपमा उपस्थित बाणगङ्गा नगरपालिकाकी उप–प्रमुख रिता कुमारी चौधरीले सबै धर्म, संस्कृति र समुदायको सम्मान गर्नुपर्नेमा जोड दिनुभयो । उहाँले धर्म फरक–फरक भए पनि ईश्वर सबैको एउटै भएको बताउँदै आपसी सद्भाव र सहिष्णुता आजको आवश्यकता भएको उल्लेख गर्नुभयो ।
उप–प्रमुख चौधरीले गत आर्थिक वर्षमा उक्त गिरिजाघरको बाउन्ड्री वाल निर्माणका लागि करिब ४ लाख रुपैयाँ बजेट विनियोजन गरिएको र सो कार्य सफलतापूर्वक सम्पन्न भएकोप्रति खुशी व्यक्त गर्दै मण्डली परिवारलाई धन्यवाद दिनुभयो । आगामी दिनमा पनि नगरपालिकाको तर्फबाट सक्दो सहयोग गर्ने प्रतिबद्धता जनाउँदै नगरभित्र रहेका सबै जातजाति, भाषा–भाषी, धर्म र संस्कृतिको सम्मान नगरपालिकाको प्राथमिकता रहेको स्पष्ट पार्नुभयो ।
कार्यक्रममा जिल्ला समन्वय समिति सदस्य सुमित्रा परियार, वडा नं। २ का वडा सदस्य झिमलाल सापकोटा, नेपाल पत्रकार महासंघ लुम्बिनी प्रदेश सदस्य पत्रकार सरिता थारुलगायतको विशिष्ट आतिथ्यता रहेको थियो ।
बिश्वासी मण्डलीका वरिष्ठ पास्टर मोहन कुमार मसिहको अध्यक्षता तथा दिपक विकको सञ्चालनमा सम्पन्न कार्यक्रममा येशू ख्रिष्टको महिमा समेटिएका विभिन्न गीत–संगीत तथा नृत्य प्रस्तुत गरिएको थियो ।
कार्यक्रममा गुरु आमा राधिका अधिकारी, पास्टर रेखा चौधरी, मर्कुस चौधरी, यमबहादुर पुन, सालझण्डी बिश्वासी मण्डलीका पास्टर यमप्रसाद श्रेष्ठलगायत स्थानीय धर्मावलम्बीहरूको उल्लेख्य सहभागिता रहेको थियो ।
कार्यक्रमले आपसी सद्भाव, धार्मिक सहिष्णुता र सामाजिक एकताको सन्देश प्रवाह गरेको सहभागीहरूले बताएका छन् ।
