अर्घाखाँची, साउन १२। राष्ट्रिय संगीतकर्मी संघ, जिल्ला कार्यसमिति अर्घाखाँचीको तेस्रो अधिवेशनबाट तेजेन्द्र सम्शेर पाण्डेय अध्यक्षमा निर्वाचित भएका छन्।
सन्धिखर्कमा सम्पन्न अधिवेशनले पाण्डेयको नेतृत्वमा ११ सदस्यीय नयाँ जिल्ला कार्यसमिति सर्वसम्मत रूपमा चयन गरेको हो।
नवनिर्वाचित कार्यसमितिको प्रथम उपाध्यक्षमा सन्देश रणपाल, द्वितीय उपाध्यक्षमा शुभम गुरुङ, महिला उपाध्यक्षमा प्रमिला दर्नाल, सचिवमा सरोज पाण्डे, सहसचिवमा सन्तोष गिरि, कोषाध्यक्षमा उत्कर्ष गिरि तथा सदस्यहरूमा कोसिस खत्री, सरोज गहतराज, पवित्रा विक र प्रवेश परियार निर्वाचित भएका छन्।
अधिवेशनलाई सम्बोधन गर्दै राष्ट्रिय संगीतकर्मी संघका केन्द्रीय उपाध्यक्ष जीवन परियार र पत्रकार सहयोगी बि.सी. ले नवनिर्वाचित कार्यसमितिलाई बधाई तथा सफल कार्यकालको शुभकामना व्यक्त गरेका थिए।
कार्यक्रम नवनिर्वाचित अध्यक्ष तेजेन्द्र सम्शेर पाण्डेयको अध्यक्षतामा सम्पन्न भएको थियो। कार्यक्रममा राष्ट्रिय संगीतकर्मी संघका केन्द्रीय उपाध्यक्ष जीवन परियार प्रमुख अतिथि, पूर्व केन्द्रीय सचिव थानेश्वर अधिकारी, प्रदेश अध्यक्ष पूर्णचन्द्र परियार तथा पत्रकार सहयोगी बि.सी. अतिथिका रूपमा सहभागी थिए। कार्यक्रमको सञ्चालन सचिव सरोज पाण्डेले गरेका थिए।
नवनिर्वाचित कार्यसमितिले अर्घाखाँची जिल्लामा संगीतकर्मीहरूको हकहित संरक्षण, सिर्जनात्मक गतिविधिको प्रवर्द्धन तथा संगीत क्षेत्रको विकासका लागि सक्रियतापूर्वक काम गर्ने प्रतिबद्धता जनाएको छ।
