भाद्र ३१ गते २०७९, तिलोत्तमा,
तिलोत्तमा चेम्बर अफ कमर्सद्वारा आयोजित भोजन तथा फलफुल वितरण कार्यक्रम मानवसेवा आश्रम मोक्षधाममा सम्पन्न भएको छ ।
सधै जसो कार्यालय परिसरमा गरिने स्थापना दिवस कार्यक्रम यस पटक भने तिलोत्तमा न.पा वडा नं. ६, मोक्षधाम स्थित मानवसेवा आश्रममा भएको हो। संघका अध्यक्ष बाबुलाल भुसालको अध्यक्षतामा तथा सोह्र छत्तीस संयुक्त सिचाइ प्रणालीका अध्यक्ष एवं संस्थाका सल्लाहकार यज्ञ गैरेको प्रमुख आतिथ्यतामा सम्पन्न कार्यक्रममा विभिन्न व्यक्तित्व एवं अतिथिहरुले मन्तब्य राख्नु भएको थियो । सो कार्यक्रममा बोल्दै प्रमुख अतिथि यज्ञ गैरेले संस्थाले गरेका व्यावसायिक एवं सामाजिक कार्यहरु अग्रभागमा रहेर कार्य गरेको प्रति धन्यवाद ब्यक्त गर्नु भएको थियो।
साथै आश्रममा रहेका असहाय ब्यक्तिहरुका लागि भोजन तथा फलफुल वितरण कार्यक्रम आयोजना गरेर थप उत्कृष्ट कार्य गरेकोले आगामी दिनमा यस्तै गरी सामाजिक कार्यक्रमहरु अगाडि बढाउदै लैजानु हुन अनुरोध गर्नु भएको थियो । संस्थाका अध्यक्ष बाबुलाल भुसालले संघको कार्ययोजना अनुसार उद्योगी , व्यावसायिक एवं सामाजिक कार्यहरुमा निरन्तर अगाडी बढिरहेको जानकारी गराउनु दिनु भएको थियो। साथै उहाँले उपस्थित सम्पुर्णलाई धन्यवाद दिदै आगामी दिनमा गरिने ब्यक्तिगत एवं संस्थागत कार्यक्रमहरु विशेष गरी असहाय ब्यक्तिहरुका लागि मानवसेवा आश्रममा गर्न एवं सक्दो सहयोग गर्न समेत आग्रह गर्नु भएको थियो । कार्यक्रममा स्वागत मन्तव्य संघका प्रथम उपाध्यक्ष रामचन्द्र पाण्डेयले राख्नु भएको थियो भने शुभकामना मन्तव्य संघका संस्थापक अध्यक्ष एवं संरक्षक तथा लुम्बिनी प्रदेश चेम्बर अफ कमर्सका महासचिव झबिन्द्र प्रसाद कंडेल, मानवसेवा आश्रमका संस्थापक अध्यक्ष रामजी अधिकारी, चेम्बरका पुर्व सल्लाहकार यमदत्त सुवेदी लगायतले आ-आफ्ना भनाईहरु राख्नु भएको थियो ।
कार्यक्रमको संचालन महासचिव बिष्णु बरालले गर्नुभएको थियो । साथै कार्यक्रममा अन्य अतिथिहरु , सल्लाहकार , पुर्व पदाधिकारी , पुर्व कार्यसमिति सदस्य , पुर्व लेखासमिति साथै संघका पदाधिकारी , कार्यसमिति सदस्य , लेखासमिति , उद्योगी , व्यवसायी सदस्यज्यूहरु , सामाजिक व्यक्तित्वहरु एवं कर्मचारीहरुको उपस्थिति रहेको संघका कार्यालय प्रमुख रामु सापकोटाले जानकारी दिनु भएको थियो ।
