बारा । निजगढ नगरपालिका–७ स्थित गाडी मर्मत गर्ने ग्यारेज (कारखाना)मा एक साता अगाडि भएको विस्फोट घटनामा दोषी देखिएको आंशकामा प्रहरीले धनुषाबाट दुईजना पक्राउ गरेको छ ।
प्रहरीले धनुषा गणेशमान चारनाथ नगरपालिका–२ स्थित न्यू शिव स्क्र्यापका सञ्चालक सर्लाही चक्रघट्टा गाउँपालिका–१ निवासी वर्षीय ४१ शिवशंकर साह र कबाडी संकलक सर्लाही ईश्वरपुर नगरपालिका–७ निवासी ४६ वर्षीय बिल्टु महतोलाई प्रहरीले पक्राउ गरेको हो। यो संगै पक्राउ पर्नेको सख्या पाँच पुगेको छ ।
प्रहरीले रमेश जैसवाल, बासु तामाङ्ग र टिकाराम पाख्रिनलाई पक्राउ गरेको थियो । उनीहरुलाई जिल्ला अदालत बाराबाट ७ दिनको म्याद लिएर प्रहरीले अनुसन्धान अघि बढाएको छ । ग्यारेजमा भएको विस्फोटमा परी तीनको मृत्यु भएको थियो भने तीनजना घाइते भएका छन्। निजगढ नगरपालिका– ९ का कवाडी सञ्चालक राज जैसवालले ‘प्रोजोक्टाइल’जस्तै देखिने वस्तुमा भएको तामा निकाल्न ल्याएको र सो क्रममा उक्त वस्तु विस्फोट भएको प्रहरीको भनाइ छ ।
यसैबिच, निजगढ नगरपालिकाका नगर प्रमुख सुरथ पुरीको अनुरोधमा वीरगञ्जस्थित बयोधा अस्पतालले उपचारमा भएको खर्च रकममा छुट्ट दिएको छ । उपचारको क्रममा भएको खर्च रकम आफन्तले बुझाउन नसकेपछि अस्पताल प्रशासनले उनीहरुलाई छुट्ट दिएको बयोधा अस्पतालका प्रशासक बिष्णु पटेलले जानकारी दिएका छन् ।
