तौलिहवा । सामाजिक उत्तरदायित्व तथा मानवीय सेवाको भावनालाई आत्मसात गर्दै युनिक एग्रो सेन्टर तथा रुपक भेट फर्माको आयोजनामा मदरसा अहले सुन्नत नाइमुल वुलुम, तौलिहवामा अध्ययनरत ५ जना गरिब तथा विपन्न विद्यार्थीलाई कपडा वितरण गरिएको छ ।
मस्जिद टोलमा आयोजित कार्यक्रममा आर्थिक अवस्था कमजोर भएका बालबालिकालाई लक्षित गरी आवश्यक कपडा सहयोग गरिएको आयोजकले जनाएको छ । सहयोग हस्तान्तरण कार्यक्रममा बोल्दै आयोजक संस्थाका सञ्चालक रुपक गुप्ताले समाजमा रहेका विपन्न तथा असहाय बालबालिकाको शिक्षा र मनोबल वृद्धि गर्ने उद्देश्यले कार्यक्रम आयोजना गरिएको बताए ।
उनले बालबालिकाको उज्ज्वल भविष्य निर्माणका लागि समाजका हरेक क्षेत्रबाट सहयोग र सहकार्य आवश्यक रहेको उल्लेख गर्दै आगामी दिनमा पनि यस्ता सामाजिक तथा मानवीय कार्यलाई निरन्तरता दिने प्रतिबद्धता व्यक्त गरे ।
कार्यक्रममा मदरसाका प्रधानाध्यापकले सहयोगप्रति आयोजक संस्था र सहयोगीहरूप्रति आभार व्यक्त गर्दै यस्ता सहयोगले विद्यार्थीहरूमा थप उत्साह र सकारात्मक ऊर्जा थप्ने बताए ।
त्यसैगरी कार्यक्रममा समाजसेवी खुर्सेद अहमद खा, भुसाल एग्रोभेट एन्ड दूध डेरी सेन्टरका सञ्चालक सुदिप भुसाल,निरज जयसवाल, सागर परियार,फिरोज गद्दी लगायत स्थानीय व्यक्तित्वहरूको सहभागिता रहेको थियो ।
स्थानीय स्तरमा गरिएको यस्तो सहयोगमूलक कार्यले विपन्न समुदायका बालबालिकामा आत्मविश्वास बढाउनुका साथै सामाजिक सद्भाव र सहयोगको संस्कृतिलाई थप मजबुत बनाउने विश्वास गरिएको छ ।
