लुदस, जीतपुर।
सनातन हिन्दू धर्मावलम्बीहरूको महान् पर्व हरिशयनी एकादशीको पावन अवसरमा कपिलवस्तुको बाणगंगा नगरपालिका–४, जीतपुर बजार क्षेत्रमा कपिलवस्तु युवा भजन समूहको आयोजनामा आगामी शनिबार भव्य भजन तथा सांस्कृतिक साँझ आयोजना हुने भएको छ।
भगवान् श्रीविष्णु चार महिनासम्म योगनिद्रामा प्रवेश गर्ने दिनका रूपमा मनाइने हरिशयनी एकादशीलाई हिन्दू धर्ममा विशेष महत्वका साथ मनाइन्छ। यस दिन व्रत, पूजा, हरिनाम संकीर्तन, भजन–कीर्तन तथा सत्सङ्गमा सहभागी भई आध्यात्मिक साधना गर्ने परम्परा रहिआएको छ। यही धार्मिक परम्परालाई निरन्तरता दिँदै युवा पुस्तालाई धर्म, संस्कृति र नैतिक मूल्यसँग जोड्ने उद्देश्यले भजन साँझको आयोजना गरिएको आयोजकले जनाएको छ।

कपिलवस्तु युवा भजन समूहले विगत करिब छ महिनादेखि जिल्लाका विभिन्न धार्मिक स्थल, मठ–मन्दिर तथा धार्मिक अनुष्ठानहरूमा नियमित रूपमा भजन–कीर्तन सञ्चालन गर्दै आएको छ । समूहले युवाहरूलाई सनातन संस्कृति, आध्यात्मिक चेतना र धार्मिक आस्थासँग जोड्ने अभियानलाई निरन्तर अघि बढाइरहेको छ। स्थानीयस्तरमा धार्मिक जागरण फैलाउन तथा सामाजिक सद्भाव सुदृढ बनाउन समूहले उल्लेखनीय भूमिका निर्वाह गर्दै आएको छ।

कार्यक्रममा हरिनाम संकीर्तन, भक्ति सङ्गीत, धार्मिक प्रवचन तथा सामूहिक भजन प्रस्तुत गरिने आयोजकले जनाएको छ। भजन–कीर्तनमार्फत भगवान् श्रीहरिको महिमा गान गर्दै समाजमा शान्ति, सद्भाव, नैतिकता र आध्यात्मिक चेतनाको सन्देश प्रवाह गरिने विश्वास गरिएको छ।

कार्यक्रमलाई श्रीङ्गिघाट सामुदायिक वन उपभोक्ता समूहले संरक्षण गरेको छ। स्थानीय समुदाय, धार्मिक संघसंस्था तथा भक्तजनहरूको सक्रिय सहभागिताले कार्यक्रमलाई अझ भव्य बनाउने अपेक्षा गरिएको छ।
कार्यक्रम संयोजक एलिस कार्कीले हरिशयनी एकादशीको पुण्य अवसरमा आयोजना गरिएको यस धार्मिक तथा आध्यात्मिक कार्यक्रममा सम्पूर्ण धर्मप्रेमी, श्रद्धालु भक्तजन, युवा तथा सर्वसाधारणलाई परिवारसहित उपस्थित भई भजन–कीर्तनको पुण्य लाभ लिन अनुरोध गरेका छन्।
आयोजकका अनुसार यस्ता धार्मिक तथा सांस्कृतिक कार्यक्रमहरूले सनातन धर्मको संरक्षण, संस्कृतिको जगेर्ना, सामाजिक एकता तथा नयाँ पुस्तामा आध्यात्मिक मूल्य र नैतिक संस्कारको विकास गर्न महत्वपूर्ण योगदान पुर्‍याउने विश्वास लिइएको छ।