राष्ट्रलाई ओली नेतृत्वकै खाँचो रहेको भन्दै कपिलवस्तुका युवाद्धारा विशाल प्रदर्शन

हरि आचार्य कपिलवस्तु,असार १९
सत्तारुढ दल नेपाल कम्युनिष्ट पार्टी (नेकपा) अध्यक्ष तथा प्रधानमन्त्री केपी शर्मा ओलीको समर्थनमा कपिलवस्तुमा विशाल प्रदर्शन भएको छ । नेकपा समर्थक युवाहरुको सक्रियतामा चार नम्बर जितपुर चोकमा गरिएको प्रर्दशनमा ठूलो संख्यामा युवाहरुको सहभागिता रहेको थियो । पार्टीभित्र ओलीलाई प्रधानमन्त्री र अध्यक्ष दुवै पदबाट राजीनामा दिनुपर्ने माग स्थायी समितिमा उठिरहेको बेला राष्ट्रलाई ओली नेतृत्वकै खाँचो रहेको भन्दै युवा तथा विद्यार्थीहरुले प्रदर्शन गरेका हुन् । उनीहरुले दुवै पदबाट ओलीलाई हटाउन नहुने भन्दै प्रदर्शन गरेका थिए ।

उनीहरूले ५ वर्षको स्थायी सरकारको लागि भनेर मतदान गरिएकाले अहिले नै केपी शर्मा ओलीलाई प्रधानमन्त्रीको पदबाट हटाउन नहुने भन्दै नाराबाजी गरेका हुन् । नाराबाजीमा सहभागी भएकाहरूले वर्तमान सरकारलाई अस्थिर बनाउन भारतको इसारामा नेपालकै नेताहरू लागिपरेको आरोप लगाउँदै भारतबाट चलेकाहरूले व्यक्तिगत स्वार्थ पूरा गर्न कुर्सीको लडाइँमा लागेको दाबी गरे ।

कोणसभामा अनेरास्ववियू केन्द्रीय सदस्य टुकलाल गैरेले भारतले नेपालमाथि गरेको नाकाबन्दीको बेलामा ओली सरकार नझुकेको, प्रधानमन्त्री ओली आफ्नो कठिन स्वास्थ्य अवस्थाका बाबजुद पनि नेपाललाई विकासोन्मुख देशबाट विकसित देश बनाउन लागि परेको बताए । उनले भारतले मिचेको नेपाली भूमिको वास्तविक नक्सा जारी गरेको, देशमा रेल र पानी जहाज चलाउन लागेको लगायतका कारण ओली नै सक्षम प्रधानमन्त्री भएकोले वर्तमान सरकार नरहे नेपालीको स्वाभिमान गुम्ने दावी गरे ।

यस्तै अनेरास्ववियूका पुर्व जिल्ला अध्यक्ष गोबिन्द प्रसाद आचार्य (बिकास) ले पाँच वर्षका लागि जनताले म्याण्डेड दिएर बनेको सरकारलाई बीचमा नै ढलाएर अस्थीरता सिर्जना गर्न खोजिएको भन्दै यसले देशलाई थप द्वन्द्वमा लैजाने बताए । देश कोरोना महामारीको संक्रमणविरुद्ध लडिरहेको अवस्थामा सरकारलाई सहयोग गर्नुपर्ने उनको भनाइ छ । आचार्यले प्रधानमन्त्री ओलीले भारत नेपालको मिचिएको भुभागलाई फिर्ता ल्याएर संविधान संशोधन गरी नक्सानै सार्वजनिक गर्ने महान कार्य पछि उनी विरुद्ध भारतीय विस्तारवादनै लागि परेको छर्लङ्ग भएको दावी गर्दै कदापि त्यसो हुन नदिने चेतावनी दिए ।

प्रधानमन्त्री ओलीका समर्थकहरूले ‘केपी ओली जिन्दाबाद’, ‘आजलाई होइन भोलिलाई, ५ वर्ष ओलीलाई’, ‘स्थायी सरकार कायम गर’, ‘भारतीय दलाल मूर्दावाद’, ‘विदेशी हस्तक्षेप मुर्दावाद’, पार्टी स्थिरता कायम गर, लिम्पियाधुरा हाम्रो हो लगायतका नाराहरू लगाएका थिए । प्रदर्शनमा कपिलवस्तुका नेकपा समर्थक युवाहरुको उल्लेखनीय सहभागिता रहेको थियो ।

अनेरास्ववियू जिल्ला संयोजक बाबुरमा अर्यालले कोणसभाको सञ्चालन गरेका थिए ।

Recommended For You

About the Author: Lumbini Darpan Online

Leave a Reply

Your email address will not be published. Required fields are marked *