राम प्रघट कोरी विजयनगर, असार २९
कृषि विशेष कार्यक्रम अन्तर्गत प्रदेश सरकारको अनुदानमा कपिलवस्तुको विजयनगर गाउँपालिकाले १ सय युवाहरुलाई अनुदान रकम दिएको छ । विश्वभरी महामारीको रुपमा फैलिएको कोरोना भाइरसका कारण रोजगारी खोसिएर बिदेशबाट फर्किएका युवाहरुलाई अनुदान रकम वितरण गरिएको हो । रोजगारीका सिलसिलामा विभिन्न देशमा गएका युवालाई विभिन्न किसिमका व्यवसाय गर्नका लागि प्रति युवा २० हजार रुपियाँ अनुदान रकम प्रदान गरिएको हो ।
सरकारको नीति तथा कार्यक्रम अनुसार ३ देखि ५ कट्ठामा तरकारी खेती गर्ने, ५ ओटा बंगुर, ५ ओटा बाख्रा र ५० ओटा कुखुरा पाल्ने युवाहरुलाई अनुदान रकम दिएको कृषि विकास शाखाका निमित्त प्रमुख प्रभुनाथ यादवले जानकारी दिए ।
कार्यक्रममा बोल्दै गाउँपालिका अध्यक्ष गोपाल बहादुर थापाले कोरोना भाइरसले सबैलाई प्रभावित पारेको भन्दै व्यवसायी कसरी बन्ने र अनिवार्य रुपमा सरकारको नीति तथा कार्यक्रम अनुसार आफुले रोजेको तरकारी खेती, पशुपालन र कुखुरा पालन गर्नै पर्ने बताए ।
पाएको अनुदान रकमलाई अधिकतम सदुपयोग गर्दै अगाडी बढ्न सबैलाई अध्यक्ष थापाले अनुरोध गरे । व्यवसायीकरण गरेर सफल हुने युवालाई अनुदानलाई प्राथमिकता दिने उनले बताए । व्यवसायीकरण र त्यसमा सफल हुन नसेका युवालाई अनुदान दिन नसकिने समेत प्रष्ट पारे ।
यस्तै गाउँपालिका प्रमुख प्रशासकीय अधिकृत गोविन्द भट्टराई कोरोना भाइरसका कारण रोजगारी खोसिएका युवालाई आत्मनिर्भर र व्यवसायीकरण गर्दै जाने उद्धेश्यले प्रति युवालाई २० हजार रुपियाँ दिएको जानकारी दिए ।
