नमूना विद्यालयमा सैनामैना र केरवानी मावि छनोट

ByLumbini Darpan Online

१ श्रावण २०७७, बिहीबार १५:३९ १ श्रावण २०७७, बिहीबार १५:३९ १ श्रावण २०७७, बिहीबार १५:३९

लुदअ रुपन्देही, साउन १
यस वर्ष रूपन्देहीका २ विद्यालय नमूना विद्यालयका लागि छनोट भएका छन् ।

रूपन्देहीको क्षेत्र नम्बर २ अन्तर्गत पर्ने सैनामैना नगरपालिका–१ को सैनामैना मावि र क्षेत्र १ नम्बर अन्तर्गत पर्ने देवदह नगरपालिका–४ को केरवानी माविलाई शिक्षा तथा मानव स्रोत विकास केन्द्रले नमूना विद्यालयमा छनोट गरेको हो ।

नमूना विद्यालयका लागि जिल्लाका लिलाराम मावि, भानु, पशुपति, फर्साटिर, सैनामैना र केरवानी आवेदन दिएका थिए । यस वर्ष सरकारले देशभरमा १०० वटा सामुदायिक विद्यालयलाई नमूना छनोट गरेको छ ।

यी विद्यालयलाई नमूना छनोटका लागि रूपन्देही क्षेत्र नम्बर २ का प्रतिनिधिसभा सदस्य तथा पूर्व अर्थमन्त्री विष्णु पौडेलले विशेष पहल गरेका थिए । रुपन्देहीका जिल्ला शिक्षा समन्वय अधिकारी दीपेन्द्र ढकालले छनोट भएका विद्यालयले चाँडै नमूना विद्यालय कार्यान्वयनका लागि प्रक्रिया अघि बढाउने बताए ।

ढकालले विद्यार्थी संख्या, ३ वर्षको एसईईको नतिजा, जग्गा व्यवस्थापन, ‘प्लस टू’ का कार्यक्रम, इन्टरनेटको पहुँच, वैकल्पिक ऊर्जा लगायतका मापदण्डका आधारमा रहेर मूल्यांकन गरी विद्यालय छनोट हुने बताए ।

नमूना विद्यालय छनोटपछि शिक्षाको गुणस्तर र भौतिक सुधार राम्रो हुन्छ । नमूना विद्यालयमा छनोट भइसकेका रुपन्देहीका कालिका मानवज्ञान, शान्ति, छपियाको पब्लिक मावि, कञ्चनको प्रगति मावि र लुम्बिनी आदर्श माविले शैक्षिक गुणस्तरणसँगै भौतिक विकासमा राम्रो फड्को मारेका छन् ।

नमूना विद्यालय सञ्चालन व्यवस्थापन निर्देशिका–२०७४ अनुसार विद्यालय सञ्चालन हुनुपर्नेछ । यी विद्यालयले आफ्नो गुरुयोजना बनाउने छन् । गुरुयोजना अनुसार विद्यालयको भौतिक र शैक्षिक सुधारका लागि संघीय सरकारले १ करोडदेखि २ करोड ५० लाख रुपैयाँ बजेट उपलब्ध गराउँछ ।

विद्यालयले शैक्षिक, भौतिक, व्यवस्थापकीय र प्रशासनिक सम्झौता गरेर सञ्चालन गर्नुपर्नेछ । हरेक वर्ष शैक्षिक गुणस्तरमा अभिवृद्धि, एसईई नतिजामा सुधार ल्याउनुपर्ने हुन्छ । सैनामैना माविका प्रधानाध्यापक नेत्र पुरीले शिक्षा विभागले तोकेको ढाँचा अनुसार विद्यालयलाई कार्यक्रम पूर्णरुपमा कार्यान्वनमा ल्याइने बताए ।

सैनामैना माविमा पर्रोहा परमेश्वर आधारभूत मावि मर्ज भएको थियो । सैनमैना माविमा १ हजार २११ विद्यार्थी छन् ।

Facebook Comments Box

Leave a Reply

Your email address will not be published. Required fields are marked *