थानेश्वर अधिकारी, जितपुर।
सामाजिक क्षेत्रको अग्रणी संस्था सिद्धार्थ सामाजिक विकास केन्द्रको २४ औं वार्षिक साधारण सभा आज ४ नं मा सम्पन्न भएको छ । सामाजिक रुपान्तरणमा लामो समयदेखि कृयाशिल रहेको संस्थाले मानव अधिकारको संरक्षण, शिक्षा, स्वास्थ्य, रोजगारी, युवा, किशोर किशोरी लक्षित कार्यक्रम तथा कोभिड–१९ मा सहयोग पुराएर प्रदेश स्तरमै उल्लेखनीय काम गरेको छ ।
कार्यक्रमका प्रमुख अतिथी संस्थापक सचिव तथा पुर्व अध्यक्ष टंक प्रसाद आचार्यले संस्थालाई दिगो रुपमा संचालन गर्न आफनो छु्ट्टै कोष बनाएर सामाजिक सवालहरुमा थप काम गर्नुपर्ने बताएका छन् । उनले संस्था स्थापनाकाल देखि हालसम्म आइपुग्दा संस्थाले गरेका कामहरुलाई नजिकबाट नियालेको बताउँदै अव संस्थालाई दिगो रुपमा संचालन गर्न स्थानीय श्रोत साधनको अधिकतम उपयोग गर्दे लैजानुपर्ने बताएका छन् ।
त्यस्तै संस्थाका संस्थाका संस्थापक कोषाध्यक्ष तथा पूर्व अध्यक्ष टिकाराम पौडेलले विभिन्न परिस्थितीलाई सामना गर्दै सामाजिक रुपान्तरणको क्षेत्रमा एकढिक्का भएर संस्था अघि बढिरहेको बताए । उनले खानेपानी सरसफाई र खेलकुदबाट शुरु गरेको संस्थाले अवका नयाँ र समसामहिक सवालहरुमा काम गर्दै जानुपर्ने बताएका छन् ।
संस्थाका सस्थापक सदस्य तथा पूर्व अध्यक्ष पोमनारायण पौडेलले कपिलवस्तु जिल्लामै सामाजिक सवालहरुलाई अगुवाई गर्दै आइरहेको संस्थाले नमुनाको रुपमा संस्थाका गतिविधी बढाउनुपर्ने बताए । कपिलवस्तुमा सामुदायिक अस्पताल र सहकारीको अवधारणा पहिलो पटक संस्थाले शुरुवात गरेकाले यसलाई व्यवस्थित बनाउनु पनि हाम्रो दायित्व भएको बताएका छन् ।
संस्थाका अध्यक्ष तेज प्रसाद आचार्यले संस्थाका सदस्यहरुले स्थानीय स्तरमा धेरै सामाजिक क्षेत्रको अगुवाई गरिरहेकोले वदलिदो परिवेश अनुसार नया नयाँ सवालहरुमा थप कार्यक्रमहरु विस्तार गर्दै लैजाने बताएका छन्।
संस्थाका सचिव रोमकान्त घिमिरेले प्रगति प्रतिवेदन पेश गर्दै आगामी ५ वर्षका लागि शिक्षा र बालअधिकार, दिगो जीविकोपार्जन, स्वास्थ्य अधिकार, सुशासन र मानव अधिकारका सवाललाई प्राथमिकतामा राखेको बताएका छन् ।
त्यस्तै संस्थाका कोषाध्यक्ष हरिलाल शर्माले आ।ब। २०७७।०७८ का लागि ६ करोड बराबरको प्रस्तावित कार्यक्रम बजेट पेश गरेका छन् । साधारण सभामा आन्तरिक लेखा उपसमितिका संयोजक शोभा आर्चाले सुझाव सहितको लेखा प्रतिवेदन प्रस्तुत गरेकी छन् ।
साधारण सभामा सिद्धार्थ क्याम्पसका सहायक क्याम्पस प्रमुख गोविन्द खनाल, महिला अधिकारकर्मी रुकैया खातुन लगाएतले शुभकामना दिएकी छन् । कार्यक्रम संस्थाका अध्यक्ष तेज प्रसाद आचार्यको अध्यक्षता, उपाध्यक्ष सूर्यकुमारी शाहीको स्वागत तथा सचिव रोमकान्त घिमिरेको संचालनमा सम्पन्न भएको थियो । सभाले ११ बुँदे समसामयिक प्रस्तावहरु समेत पारित गरेको छ ।
